Google правяла скарачэнні ў воблачным падраздзяленні, каб укладвацца ў АІ

«Пад нож» патрапіла менш за сто чалавек, яны былі звязаныя з продажамі. Скарачэнні закліканыя вызваліць рэсурсы для інвеставання ў само падраздзяленне і ў АІ, адзначаюць крыніцы.

Прадстаўнік Google у каментары сказаў, што кампанія праводзіць змяненні з мэтай лепш задавальняць патрэбы кліентаў і быць гатовай да магчымасцяў, якія ляжаць перад ёй. «Мы праводзім змяненні, каб працягваць інвеставаць у сферы, якія маюць крытычную важнасць для нашага бізнэсу і забеспячэння поспеху ў доўгатэрміновай перспектыве», — растлумачыў ён.

Звальненні прайшлі на фоне запаволення росту Google Cloud і велізарных выдаткаў на АІ-амбіцыі кампаніі. У гэтым месяцы Alphabet выпусціла фінансавую справаздачу — воблачнае падраздзяленне не апраўдала прагнозаў аналітыкаў па выручцы, а план па капітальных выдатках на 2025 год выявіўся значна вышэйшым за чаканае.

У студзені кампанія запусціла праграму добраахвотнага сыходу для супрацоўнікаў падраздзялення Platforms and Devices, у якое ўваходзяць распрацоўшчыкі дэвайсаў пад брэндам Pixel і аперацыйнай сістэмы Android.

Пры гэтым Google Cloud застаецца адным з ключавых кірункаў для ўкладанняў кампаніі. У часе апошняй фінансавай справаздачы кіраўніцтва заяўляла, што ў 2025 годзе плануе нарошчваць штат у такіх кірунках — у прыватнасці, у АІ і воблачным бізнэсе.