Маск шукае геймдэў-распрацоўшчыкаў для сваёй студыі

«Калі вы зацікаўлены ў стварэнні супервясёлых, рэвалюцыйных відэагульняў з выкарыстаннем штучнага інтэлекту, дашліце прыклады вашых папярэдніх прац па відэагульнях», — напісаў Маск. Рэзюмэ і партфоліа можна дасылаць на адрас gamestudio@x.ai.

Ідэя стварыць студыю з’явілася ў Маска ў лістападзе мінулага года. Білі Маркус, адзін з аўтараў Dogecoin, раскрытыкаваў ідэалагічную ангажаванасць распрацоўшчыкаў і журналістаў у гульнявой індустрыі.

Маск яго падтрымаў і заявіў, што сапраўдныя геймеры адмаўляюць «маніпулятыўную лухту» і цэняць аўтэнтычнасць. «Занадта шмат гульнявых студый належаць буйным карпарацыям, — адзначыў Маск. — xAI адкрые геймстудыю з ШІ, каб зноў зрабіць гульні вялікімі».

Бізнесмен вырашыў зрабіць гульнявую студыю падраздзяленнем xAI. Паводле яго слоў, студыя будзе выкарыстоўваць перадавыя тэхналогіі ШІ і вылічальныя магутнасці xAI, уключаючы 100 000 графічных працэсараў Nvidia, каб ствараць унікальныя гульні. Пакуль невядома, у якім жанры будуць распрацоўвацца гульні і якія менавіта праекты знаходзяцца ў працы.