Маск патлумачыў, чаму вырашыў пазбавіцца ад назвы і лагатыпа Twitter

Мільярдэр адзначыў, што справа не проста ў перайменаванні, калі кампанія працягвае рабіць тое ж самае, што і да яго. «Назва Twitter мела сэнс, калі можна было толькі публікаваць паведамленні памерам 140 сімвалаў — як калі птушка цырыкнула», — напісаў Маск.

Ён жа хоча стварыць на базе сацсеткі «суперпраграму» пад назвай X, якая аб’яднае ў сабе магчымасці камунікацыі, шырокага абмену мультымедыя і праз якую карыстальнік зможа кіраваць усімі сваімі фінансавымі аперацыямі.

Рэбрэндынг пракаментавала новая гендырэктарка Twitter Лінда Якарына, якая спрабуе паправіць імідж сацсеткі сярод рэкламадаўцаў. Паводле яе слоў, абноўленая пляцоўка будзе валодаць плацежным і банкаўскім функцыяналам і стане глабальным маркетплэйсам для ідэй, тавараў, паслуг і магчымасцяў. А ў яе аснове будзе ляжаць тэхналогія штучнага інтэлекту.

У красавіку з’явілася інфармацыя, што Twitter быў паглынуты X Corp., якая належыць Ілану Маску. Яшчэ ў мінулым лістападзе бізнэсовец дзяліўся сваім бачаннем Twitter 2.0: тады ён казаў, што хоча зрабіць з праграмы «суперапп» — амерыканскі аналаг кітайскага WeChat з шырокім спектрам функцый.