Маск пасварыўся з Каліфорніяй і пераносіць штаб-кватэры X і SpaceX у Тэхас

Нагодай да такога рашэння стаў новы закон Каліфорніі, які дазваляе адміністрацыі навучальных устаноў не апавяшчаць бацькоў аб рашэнні дзяцей змяніць гендарную ідэнтыфікацыю. Маск заявіў, што штаб-кватэра X з Сан-Францыска пераедзе ў Осцін, а штаб-кватэра SpaceX пераедзе з Хотарна бліжэй да пускавой пляцоўкі кампаніі таксама ў Тэхасе.

«Гэта апошняя кропля. Праз гэта і папярэднія законы, якія атакуюць не толькі сем'і, але і кампаніі, SpaceX перанясе штаб-кватэру з Хотарна ў Тэхас», — напісаў Маск. Ён дадаў, што ўжо казаў губернатару Каліфорніі Гэвіну Ньюсаму, што прыняцце падобных законаў вымусіць пакінуць штат шматлікія сем'і і цэлыя кампаніі.

Tesla, якая мігравала з Каліфорніі ў Тэхас, захавала даследчы цэнтр, а таксама працягвае выпрабоўваць аўтапілот у першым штаце. Эксперты мяркуюць, што перанос штаб-кватэр звязаны таксама з мякчэйшым рэжымам падаткаабкладання ў Тэхасе ў параўнанні з Каліфорніяй.