Маск столькі назвальняў памылкова, што эйчары Twitter завялі асобную катэгорыю для рэанбордзінгу

Ва ўнутранай сістэме кіравання персаналам Twitter цяпер ёсць тэг для «выпадкова звольненых». Яго могуць ставіць менеджары з функцыяй наймання кадраў пры паўторным даданні людзей у сістэму.

Новая опцыя спатрэбілася праз тое, як часта здараліся неабдуманыя звальненні, скарачэнні і адстаўкі. Напрыклад, частку праграмістаў звольнілі напярэдадні Дня падзякі ў лістападзе. Мінімум двух з той партыі — памылкова, іх ужо вярнулі.

«Гэта проста бардак», — апісвае працу пад кіраўніцтвам Маска адзін з супрацоўнікаў.

Паводле звестак Insider, цяпер у Twitter прыкладна 2300 супрацоўнікаў — да куплі сацсеткі мільярдэрам было 7500. Пазасталым ён загадаў працаваць у «хардкорным» рэжыме, а таксама пазвальняў тых, хто яго крытыкаваў, і стаў наймаць тых, у каго няма досведу, але ёсць вялікае жаданне працаваць пад яго кіраўніцтвам.

Некаторыя са звольненых памылкова даведваліся пра звальненне выпадкова: страціўшы доступ да айдзі-картак, якія служаць пропускам у офіс, да карпаратыўных каналаў у Slack і рабочых дэвайсаў — гэтак жа, як і звольненыя «па-сапраўднаму». У асноўным пра звальненне паведамлялі па імэйле, але часта лісты прыходзілі ўжо пасля адключэння доступаў.

Людзям, у якіх узнікалі праблемы з уваходам або з камп’ютарамі, даводзілася тэлефанаваць калегам і начальнікам, каб удакладніць, ці сапраўды іх звольнілі. А некаторым — зноўку праходзіць анбордзінг, каб зноў атрымаць доступ да ўнутраных інструментаў.