Масавыя скарачэнні ў IBM — пад пагрозай каля 9 тысяч чалавек

Афіцыйных заяваў кампанія пакуль не рабіла, таму складана зразумець, ці праводзіць яна новыя скарачэнні канкрэтных супрацоўнікаў, ці аптымізуе каманды старых прадуктаў, ці рэалізуе свае праграмы па рэлакацыі і вяртанні супрацоўнікаў у офіс.

Пра намер скарачаць штат у гэтым годзе публічна заяўляў у студзені фіндырэктар IBM. Казаў, што карэкціроўка штата будзе супастаўная з папярэднімі гадамі. Паводле ацэнак выдання, пад пагрозай скарачэння знаходзяцца каля 9 тысяч супрацоўнікаў.

Крыніцы The Register паведамляюць, што звальненні закранулі супрацоўнікаў у Ролі (Паўночная Караліна), горадзе і штаце Нью-Ёрк, Даласе (Тэхас) і Каліфорніі. Інфармацыя пра новыя звальненні з’явілася прыкладна праз тыдзень пасля таго, як партал пісаў пра звальненні ў падраздзяленні маркетынгу і камунікацый IBM. Пра гэта паведамілі на ўнутранай канферэнцыі.

The Register мяркуе, што людзей у іншых аддзелах менеджары папярэджваюць у індывідуальным парадку. Паведамляецца, што звальненні закранулі супрацоўнікаў у кансалтынгу, адказных за сацыяльныя ініцыятывы, прадукты ў сферы воблачнай інфраструктуры, продажаў, а таксама супрацоўнікаў, якія працуюць над унутрыкарпаратыўнымі сістэмамі.

Іншая крыніца, якая таксама трапіла «пад нож», кажа, што ўсім прапануюць падпісаць пагадненне пра скасаванне дамовы па ўзаемнай згодзе.

Што тычыцца Cloud Classic, яшчэ адна крыніца выдання дадала, што апошнім часам кампанія актыўна імкнецца перавесці як мага больш супрацоўнікаў падраздзялення ў Індыю. Першы суразмоўца таксама адзначыў, што тыя, хто застаўся, павінны наведваць офіс як мінімум тры дні на тыдзень. Менеджары адсочваюць наведванне, выключэнні дапускаюцца толькі па медыцынскіх прычынах.