Meta хоча ажывіць метасусвет з дапамогай гульняў з генератыўным АІ
Кампанія плануе ўкараніць генератыўны АІ у гульні віртуальнай, дапоўненай і змяшанай рэальнасці. Гэта мае дапамагчы праекту метасусвету, які цярпіць значныя страты і не выклікае цікавасці ў карыстальнікаў.
Праект метасусвету для кампаніі дагэтуль застаецца стратным і выклікае слабую цікавасць карыстальнікаў. У апошнім квартале 2023 года падраздзяленне Reality Labs панесла рэкордныя страты ў памеры $4,65 мільярда. Кіраўніцтва Meta вырашыла змяніць падыход і зрабіць стаўку на развіццё гульнявога АІ. Кампанія размясціла некалькі вакансій спецыялістаў для распрацоўкі гульняў з выкарыстаннем генератыўнага АІ.
На змену кампаніі і павелічэнне інвестыцый паўплываў асабісты інтарэс генеральнага дырэктара Meta Марка Цукерберга да распрацоўкі гульняў для гарнітур Quest. У планах кампаніі — ствараць такія гульні, якія будуць абнаўляцца пры кожным запуску, без зададзенага алгарытму. Такім чынам, адзін і той жа сюжэт можа быць паказаны ў розных варыянтах для розных карыстальнікаў.
Асноўнай гульнявой платформай стане Horizon, аднак кампанія не выключае магчымасці пашырыць тэхналогію і на іншыя платформы, у тым ліку смартфоны і ПК. Для паскарэння вытворчасці гульняў Meta будзе супрацоўнічаць з іншымі кампаніямі па стварэнні інструментаў на базе генератыўнага АІ.
На пачатку гэтага года Meta заявіла, што плануе выдаткаваць мільярды на генератыўны АІ, і сфармавала новую каманду, якая будзе займацца прадуктамі генератыўнага АІ, такімі як аватары і рэклама. Кіраўнік Reality Labs Эндру Босварт раней заявіў, што інструменты генератыўнага АІ могуць зраўняць шанцы і даць невялікім камандам распрацоўшчыкаў магчымасці буйных студый.
На думку Марка Цукерберга, спатрэбяцца гады, перш чым кампанія зможа манетызаваць генератыўны АІ. Гэта значыць, што новыя гульнявыя інвестыцыі не змогуць хутка змяніць фінансавае становішча Reality Labs —падраздзялення Meta, якое адказвае за распрацоўку метасусвету, абсталявання і софту для віртуальнай і дапоўненай рэальнасці.
Некаторыя кампаніі, такія як Inworld і Artificial Agency, ужо ўжываюць генератыўны АІ для стварэння дынамічнейшых гульнявых дыялогаў і сюжэтаў. Аднак у цэлым у гульнявой індустрыі ставяцца скептычна да паўсюднага ўкаранення гэтай тэхналогіі. У першую чаргу распрацоўшчыкі асцерагаюцца, што гэта прывядзе да маштабных скарачэнняў.
Читать на dev.by