Meta змяняе найм: ШІ будзе ацэньваць і кандыдатаў, і інтэрв’юераў

Згодна з унутраным дакументам, які атрымаў Business Insider, Meta рыхтуецца выкарыстоўваць ШІ для аўтаматызацыі ключавых аспектаў падбору персаналу, уключаючы тэставанне праграмісцкіх навыкаў, дапамогу інтэрв’юерам з пытаннямі падчас сумоўяў, а таксама выяўленне дублюючых вакансій.

Акрамя таго, кампанія плануе выкарыстоўваць унутранага ШІ-асістэнта для ацэнкі якасці працы сваіх інтэрв’юераў. Сістэма будзе адзначаць пытанні, што не адпавядаюць прынцыпам інклюзіўнасці, і ацэньваць прафесіяналізм інтэрв’юераў на падставе такіх крытэрыяў, як колькасць кандыдатаў, пераведзеных на наступны этап, і якасць іх зваротнай сувязі.

ШІ-асістэнт таксама дапаможа з планаваннем раскладу інтэрв’юераў, улічваючы іх перавагі адносна колькасці ўнутраных або знешніх сумоўяў на тыдзень, і будзе адсочваць іх навыкі, уключаючы валоданне мовамі. Асноўная мэта, пазначаная ў дакуменце, — аўтаматызаваць некаторыя функцыі, зрабіць працэс найму больш эфектыўным, гнуткім і адаптавальным.

Meta — не адзіная буйная тэхналагічная кампанія, якая выкарыстоўвае ШІ для аптымізацыі найму. Amazon ужывае ШІ-інструменты для скрынінгу кандыдатаў і падбору адпаведных роляў, хоць, як раней паведамлялася, кампанія абмяжоўвае выкарыстанне кандыдатамі ШІ-інструментаў, такіх як асістэнты па праграмаванні або аплікацыі-падказкі падчас сумоўяў.

Паводле справаздачы LinkedIn «Будучыня найму 2025», апублікаванай у лютым гэтага года, 37% апытаных арганізацый актыўна інтэгруюць або эксперыментуюць з ШІ-інструментамі ў сваіх працэсах падбору персаналу — гэта на 10% больш, чым год таму.