Кампанія плануе да канца 2026 года даць брэндам магчымасць цалкам ствараць і таргетаваць рэкламу з выкарыстаннем інструментаў штучнага інтэлекту. Гэты крок можа пагражаць пазіцыям рэкламных агенцтваў.
Кампанія плануе да канца 2026 года даць брэндам магчымасць цалкам ствараць і таргетаваць рэкламу з выкарыстаннем інструментаў штучнага інтэлекту. Гэты крок можа пагражаць пазіцыям рэкламных агенцтваў.
Сацсеткі Meta налічваюць 3,43 мільярда ўнікальных актыўных карыстальнікаў па ўсім свеце, а яе інструменты на базе ШІ ўжо дазваляюць ствараць персаналізаваныя варыянты рэкламы, фонавыя выявы і аўтаматычна карэктаваць відэааб’явы, што робіць платформы кампаніі больш прывабнымі для рэкламадаўцаў.
Паводле дадзеных The Wall Street Journal, неўзабаве брэнды змогуць загружаць выяву прадукту і ўказваць бюджэт, а ШІ Meta згенеруе рэкламу, уключаючы выявы, відэа і тэкст, а таксама вызначыць мэтавую аўдыторыю ў Instagram і Facebook, прапанаваўшы аптымальнае размеркаванне бюджэту. Акрамя таго, Meta плануе ўкараняць персаналізацыю рэкламы ў рэжыме рэальнага часу, каб карыстальнікі бачылі розныя версіі адной аб’явы ў залежнасці ад такіх фактараў, як геалакацыя.
Генеральны дырэктар Meta Марк Цукерберг назваў распрацоўку новых ШІ-інструментаў «перавызначэннем рэкламы». На сустрэчы, прысвечанай вынікам кампаніі за першы квартал гэтага года, ён падкрэсліў, што ШІ ўжо паляпшае таргетаванне, дапамагаючы знаходзіць зацікаўленую аўдыторыю, і кампанія імкнецца стварыць універсальную платформу, дзе бізнес зможа задаваць мэты, выдзяляць бюджэт, а Meta возьме на сябе ўсю лагістыку.
У 2025 годзе Meta павялічыла прагноз капітальных выдаткаў да $64–72 мільярдаў, уключаючы выдаткі на развіццё ШІ-інфраструктуры, што перавышае раней заяўленыя $65 мільярдаў. Рэклама складае больш за 97% даходаў Meta, якія дасягаюць $160 мільярдаў у год, і новая ініцыятыва можа істотна павялічыць гэтую суму, прыцягваючы малы і сярэдні бізнес, якому не па кішэні паслугі агенцтваў.
Змены ў Meta пагражаюць традыцыйным рэкламным агенцтвам, такім як WPP, Publicis Groupe і Interpublic Group, акцыі якіх упалі на 2–3,9% пасля навіны. Meta сцвярджае, што не імкнецца ліквідаваць агенцтвы, а хоча даць ім магчымасць засяродзіцца на творчасці. «Мы верым у будучыню агенцтваў, — заявіў дырэктар па маркетынгу Meta Алекс Шульц. — ШІ дазволіць агенцтвам і рэкламадаўцам засяродзіцца на важнай крэатыўнай працы, а малому бізнесу — атрымаць доступ да рэкламы».
Канкурэнты, такія як Snap, Pinterest і Reddit, таксама актыўна інвестуюць у ШІ і машыннае навучанне, каб прыцягваць рэкламадаўцаў ва ўмовах жорсткай канкурэнцыі на рынку лічбавай рэкламы. Google і OpenAI ужо запусцілі ШІ-інструменты для генерацыі відэа і выяў, але іх шырокае прымяненне ў рэкламе застаецца пад пытаннем з-за асцярог адносна бяспекі брэнда, кантролю якасці і творчасці.
Рэлацыраваліся? Цяпер вы можаце каментаваць без верыфікацыі акаўнта.
facebook и instagram помойки