Алеся Чапкевич world 13 кастрычніка 2025, 13:19

Meta патрабуе ад супрацоўнікаў працаваць у 5 разоў хутчэй

Meta ўкараняе ШІ ва ўсе працоўныя працэсы — ад напісання кода да дызайну. І цяпер ад супрацоўнікаў чакаюць, што яны будуць працаваць не «на 5% хутчэй», а «ў 5 разоў хутчэй». Такую заяву зрабіў кіраўнік напрамку метасусвету Вішал Шах.

2 каментарыя

Meta ўкараняе ШІ ва ўсе працоўныя працэсы — ад напісання кода да дызайну. І цяпер ад супрацоўнікаў чакаюць, што яны будуць працаваць не «на 5% хутчэй», а «ў 5 разоў хутчэй». Такую заяву зрабіў кіраўнік напрамку метасусвету Вішал Шах.

Па дадзеных 404 Media, ва ўнутраным паведамленні з лозунгам «Metaverse AI4P: Think 5X, not 5%» Шах растлумачыў, што Meta запускае ініцыятыву AI4P (AI for Productivity) — хоча ператварыць выкарыстанне ШІ ў штодзённую звычку, а не ў модны эксперымент.

«Наша мэта простая, але амбіцыйная: зрабіць ШІ звычкай, а не навінкай. Гэта значыць, што ШІ павінен быць убудаваны ў кожны буйны кодавы рэпазіторый і ў кожны працоўны працэс», — напісаў Шах.

Ён падкрэсліў, што гаворка ідзе не толькі пра праграмістаў: выкарыстоўваць ШІ павінны менеджары, дызайнеры і партнёры па сумежных напрамках. Па словах Шаха, супрацоўнікі павінны «закасаць рукавы, будаваць прататыпы, папраўляць багі і пашыраць межы магчымага», каб прадукты стваралiся і тэставаліся ў разы хутчэй.

Meta працягвае ўкладваць мільярды ў метасусвет, які дагэтуль не прынёс кампаніі адчувальнай аддачы. Аднак цяпер стаўка робіцца на ШІ як каталізатар эфектыўнасці. Раней Марк Цукерберг казаў, што ў найбліжэйшыя 12-18 месяцаў большая частка кода Meta будзе пісацца ШІ-агентамі. Кампанія ўжо дазволіла кандыдатам на пазіцыі распрацоўшчыкаў выкарыстоўваць ШІ пры праходжанні тэставых заданняў.

Новая палітыка ўзмацніла асцярогі супрацоўнікаў, бо калі раней ШІ успрымалі як інструмент аўтаматызацыі, то цяпер ён робіцца інструментам ціску для падвышэння прадукцыйнасці. «Тое, што раней рабіў чалавек за тыдзень, цяпер павінна рабіцца за дзень — з дапамогай ШІ», — каментуе адзін з інжынераў Meta.

Па словах Шаха, да канца года 80% супрацоўнікаў падраздзялення метасусвету павінны ўбудаваць ШІ ў штодзённую працу. Для гэтага кампанія правядзе серыю навучальных мерапрыемстваў Metaverse Day of AI Learning.

Актыўна выкарыстоўваць ШІ супрацоўнікаў прымушае не толькі Meta. У ліпені CEO Amazon Эндзі Джэсі таксама заявіў, што ШІ радыкальна зменіць працэсы і прывядзе да скарачэнняў.

Спецыялісты індустрыі папярэджваюць, што злоўжыванне ШІ пагражае наступствамі. У блогах распрацоўшчыкаў набіраюць папулярнасць артыкулы пра тое, што вайб-кодынг атупляе кодараў, пра назапашаны тэхнічны доўг і пра тое, што згенераваны код цяжка чытаць, падтрымліваць і выпраўляць — і гэта ў пэўным сэнсе бомба запаволенага дзеяння.

Тым часам Meta працягвае настойваць на інтэнсіўным укараненні тэхналогіі і сцярджвае, што эпоха павышанай прадукцыйнасці для кампаніі ўжо наступіла.