Між Манголіяй і Эквадорам: у Беларусі мінус 10 пазіцый за год у топ-100 краін для стартапаў

Сярод краін Усходняй Еўропы Беларусь займае 20 месца — мінус 2 за год, у Еўропе ў цэлым — 41 месца, таксама мінус 2 за год. Як адзначаюць аўтары рэйтынгу, Беларусь застаецца ў міжнароднай ізаляцыі і, як і ейная сталіца, апошнія тры гады губляе пазіцыі ў спісе, так і не рэалізаваўшы некалі велізарны патэнцыял для поспеху на рэгіянальным і глабальным узроўнях.

«Апошнія гады характарызуюцца палітычнай нестабільнасцю і далейшай міжнароднай ізаляцыяй на фоне вайны ва Украіне, што стварае вельмі складаныя ўмовы для мясцовых прадпрымальнікаў. Як вынік, у Беларусі ўтварылася вялікая прорва паміж яе сапраўдным патэнцыялам і цяперашнімі вынікамі, што пагаршаецца адтокам яе самых таленавітых ІТ-спецыялістаў у іншыя краіны Еўропы, дзе іх з радасцю чакаюць», — гаворыцца ў картцы рэйтынгу пра Беларусь.

Паводле слоў складальнікаў, многія кампаніі беларускага паходжання цяпер месцяцца ў іншых еўрапейскіх краінах, а стартапы, што засталіся тут, у асноўным на перадпасяўной або пасяўной стадыі. «Мясцовым экасістэмам спатрэбяцца гады, каб аднавіцца і расці. Па-першае, краіне прыйдзецца зноў заслужыць давер і інвестыцыі замежных венчурных капіталістаў, што малаверагодна ў цяперашніх абставінах. Па-другое, краіне прыйдзецца пераканаць сваіх таленавітых супрацоўнікаў вярнуцца дадому. І, па-трэцяе, спатрэбяцца новыя палітыкі, каб прадпрымальнікі захавалі штаб-кватэры ў Беларусі і разглядалі краіну як патэнцыйны рынак», — напісалі яны, дадаўшы, што будучыня тутэйшай стартап-экасістэмы і ейны ўклад у эканоміку цесна звязаныя з развіццём геапалітычнай сітуацыі.

Што тычыцца стартап-інвестыцый, то ў 2020 і 2021 гадах у Беларусі, паводле даных Startuplink, было ўкладзена па тры ўгоды на суму $500 тысяч і $2,48 млн адпаведна. У 2022 годзе гэтыя паказчыкі адпавядалі нулю.

Лідарам рэйтынгу сталі ЗША, за імі ідуць Вялікабрытанія і Ізраіль. Польшча, як і годам раней, займае 33 месца, Літва зноў 17-я. Латвія размясцілася на 39 радку (+4), Украіна — на 49-м (+1), Казахстан — на 73-м (+1). Расія змагла ўтрымаць 29 месца.

Поўная версія рэйтынгу з падрабязнымі ацэнкамі краін і метадалогіяй даследавання даступная па спасылцы.