Microsoft дапаможа Украіне яшчэ на $100 млн

Пра гэта заявіў віцэ-прэзідэнт кампаніі Брэд Сміт падчас сустрэчы з кіраўніком украінскага Мінлічбы Міхаілам Фёдаравым. Падтрымка кампаніі дазволіць украінскім дзяржаўным установам, аб’ектам крытычнай інфраструктуры і іншых сфер працягваць бясплатна выкарыстоўваць воблачныя сховішчы Microsoft.

Таксама тэхналагічная дапамога дазволіць аблічбаваць як мага больш дзяржаўных ведамстваў, у прыватнасці падтрымаць рэформу Дзяржаўнай службы статыстыкі. Ад канца лютага сумарная дапамога Microsoft Украіне складае больш за $400 мільёнаў. Кампанія падтрымлівае Украіну таксама ў сферы кібербяспекі.

«Microsoft падтрымліваў і працягвае падтрымліваць Украіну. Гэта тычыцца як фінансавых інвестыцый, так і тэхналагічнай дапамогі. Мы гатовыя падтрымаць украінскія інавацыі і праекты. Таму плануем і ў далейшым умацоўваць і пашыраць нашую супрацу», — заявіў Сміт.