Microsoft хоча цалкам перавесці Windows у воблака, каб яе можна было запускаць на любой прыладзе

У дакументах, пададзеных Microsoft у суд у рамках справы пра куплю Activision Blizzard, згадваецца, што адная з доўгатэрміновых стратэгій тэхнагіганта ў спажывецкім сегменце — усё больш пераносіць Windows 11 у воблака. З дапамогай воблака і магутнага АІ кампанія хоча цалкам змяніць досвед узаемадзеяння карыстальнікаў з аперацыйнай сістэмай і забяспечыць магчымасць запускаць яе з любой прылады і з любога пункта, дзе ёсць інтэрнэт.

Акрамя гэтага, у наступным абнаўленні Windows 11 з’явіцца функцыя Windows 365 Boot, якая дазволіць прыладам, якія працуюць пад яе кіраваннем,  пры запуску адразу ўваходзіць у воблачную АС замест лакальнай.

Раней Microsoft паказала АІ-асістэнта для Windows 11 пад назвай Windows Copilot. Таксама нядаўна з’явіліся паведамленні пра тое, што Microsoft распрацоўвае кастамныя АІ-працэсары для трэніроўкі вялікіх моўных мадэляў, каб знізіць залежнасць ад дарагіх чыпаў Nvidia.