Microsoft і Intel па-рознаму ўяўляюць сабе АІ-камп’ютар

Паводле даных The Verge, Micorosft пачала распаўсюджваць інфармацыю пра патрабаванні да камп’ютараў, якія трэба сертыфікаваць як «AI PC» для працы з АІ-асістэнтам Microsoft Copilot. Акрамя наяўнасці сумяшчальнага цэнтральнага працэсара камп’ютары маюць быць аснашчаныя выдзеленай клавішай Copilot на клавіятуры.

Intel паказвае, што на рынку ўжо ёсць ноўтбукі на базе найноўшых працэсараў, якія падтрымліваюць паскарэнне працы АІ-сістэм Microsoft, але пры гэтым не маюць клавішы для выкліку асістэнта Copilot. На думку кампаніі, такія ноўтбукі нічым не будуць саступаць сертыфікаваным і ўся праблема зводзіцца да наяўнасці або адсутнасці клавішы.

Для прасоўвання ноўтбукаў сертыфікацыя будзе мець істотнае значэнне, паколькі лагатып сертыфіката на корпусе і ўпакоўцы дазволіць прыцягнуць больш пакупнікоў, якія хочуць атрымаць доступ да асістэнта Microsoft Copilot. Вытворцы ўжо досыць даўно прапаноўваюць працэсары з функцыяй лакальнага паскарэння АІ, але без доступу да платформы Microsoft.