Колькі ІТ-бізнэсаў адкрылі беларусы ў Польшчы, Літве і Латвіі пасля 2020. І як яны маюцца

Аўтары прааналізавалі асаблівасці міграцыі беларускага бізнэсу ў Польшчу, Літву і Латвію.

Паводле звестак ZPP|Belarus Business Center, у трох краінах на сёння зарэгістравана 7,2 тысячы кампаній з беларускім капіталам, з іх больш за 630 ІТ-кампаній (каля 9% ад агульнай колькасці беларускіх бізнэсаў там).

Сукупная выручка кампаній з беларускім капіталам толькі за мінулы год і толькі па бізнэсах з даступнай фінансавай інфармацыяй ацэньваецца ў памеры каля двух мільярдаў еўра.

Польшча

У Польшчы на сёння зарэгістравана каля 6 тысяч кампаній з беларускім капіталам. За мінулы год сукупная выручка кампаній з даступнай фінансавай інфармацыяй перавысіла мільярд еўра.

Ключавыя рэгіёны для пераезду — Варшава, ваяводствы, якія мяжуюць з Беларуссю, а таксама Уроцлаў і Гданьск.

У сектары «інфармацыя і камунікацыя» зарэгістравана 529 кампаній (паводле даных польскага цэнтра эканамічнай інфармацыі, адкрыта каля 400 ІТ-кампаній з беларускім капіталам, якія вядуць дзейнасць, звязаную з праграмаваннем — заўв.).

Па колькасці кампаній сярод усіх сектараў «інфармацыя і камунікацыя» на 4 месцы.

Пік рэгістрацый новых бізнэсаў з беларускім капіталам, у тым ліку ІТ-кампаній, прыйшоўся на апошнія тры гады.

Калі ў перыяд ад 2016 да 2018 года беларусы/беларускія юрыдычныя асобы рэгістравалі ў Польшчы больш за 200 кампаній штогод, то ў 2019–2020 гадах колькасць новых кампаній вырасла да 400+, а ў 2022 годзе быў усталяваны рэкорд — больш за 1,8 тысячы кампаній. Гэта 14% ад усіх кампаній з замежным капіталам, адкрытых у Польшчы ў 2022 годзе. 

Але ў 2023 дынаміка адкрыцця новых кампаній запавольваецца. Па выніках года колькасць новых бізнэсаў з беларускім капіталам, як чакаецца, будзе прыкладна супастаўная з мінулым годам. 

Аналагічныя тэндэнцыі назіраюцца і ў ІТ-сектары. «У першую чаргу, гэта звязана з тым, што тэхналагічны сектар быў вымушаны хутка рэагаваць на крызіс і большасць кампаній ужо пераехала. Таксама гэта звязана з глабальным крызісам у індустрыі: падзеннем попыту на ІТ-паслугі і скарачэннем штатаў і бюджэтаў ІТ-кампаній», — канстатуюць аналітыкі. 

Аўтары даследавання таксама звярнулі ўвагу на ІП у Польшчы, якія працуюць у ІТ.

На канец чэрвеня бягучага года ў Польшчы было зарэгістравана 11 716 беларускіх індывідуальных прадпрымальнікаў. Яны складалі амаль чвэрць усіх замежных ІП.

Пачынаючы з другой паловы мінулага года кожны квартал у Польшчы рэгіструецца больш за 2 тысячы беларускіх ІП.

2/3 усіх беларускіх ІП у Польшчы, або больш за 7,7 тысячы — гэта айцішнікі. 

Літва

У Літве на сёння зарэгістравана 850 актыўных кампаній з беларускім капіталам (якія вядуць дзейнасць). З іх 656 (77%) — таварыствы з абмежаванай адказнасцю. Каля 80% зарэгістраваныя ў Вільні. 

У сектары «інфармацыя і камунікацыя» зарэгістраваныя 62 кампаніі з беларускім капіталам. Па колькасці дзейных беларускіх бізнэсаў сектар на пятым месцы. 

Вось так выглядае топ-10 ІТ-кампаній з беларускімі каранямі ў Літве па памеры штату на дадзены момант.

Між тым за апошні год (ад лістапада 2022 да лістапада 2023) агульная колькасць беларускіх кампаній у Літве зменшылася больш як на траціну — з 1345 да 850. Таксама нязначна скараціліся сукупныя даходы бізнэсу. 

Паводле даных аналітыкаў, выручка 278 кампаній, фінансавая інфармацыя якіх даступная, складае за мінулы год 483,4 мільёна еўра, або на 4 мільёны еўра менш, ніж у 2021. 

Ключавыя праблемы беларускага бізнэсу ў Літве (паводле даных даследавання):

• Ускладненая праца з банкамі і фінансавымі ўстановамі: адмовы пры адкрыцці рахункаў, у крэдытах, замарозкі плацяжоў.
• Адмовы контрагентаў, партнёраў і пастаўшчыкоў ад узаемадзеяння праз рэпутацыйныя рызыкі.
• Немагчымасць атрымання віз, цяжкасці пры атрыманні ДНЖ і ПМЖ.
• Складанасці пры ўзаемадзеянні з органамі ўлады.
• Павялічаная колькасць праверак.
• Высокая загружанасць нешматлікіх памежных пунктаў, якія працуюць.

Латвія

У Латвіі на сёння зарэгістраваная 371 актыўная кампанія з беларускім капіталам.

Колькасць актыўных прадпрыемстваў зніжаецца — год таму іх было 403. Аднак агульная выручка кампаній з беларускім капіталам вырасла на 14% за 2022 — ад 263 мільёнаў еўра да 299 мільёнаў еўра.

Скарачэнне колькасці кампаній можа быць звязанае з больш жорсткім кантролем за беларускім бізнэсам, але па факце яго актыўнасць у краіне расце. Так, сярэднямесячная колькасць супрацоўнікаў-беларусаў за 8 месяцаў 2023 склала 4148 чалавек — на 11% больш, ніж у 2022 годзе.

У агульнай галіновай структуры бізнэсу ІТ-кампаніі займаюць трэцяе месца па колькасці суб’ектаў гаспадарання. Усяго ў Латвіі дзейнічаюць 45 ІТ-кампаній з беларускім капіталам.

dev.by, як і іншым сумленным медыя, сёння вельмі складана: рэдакцыя працуе па-за межамі краіны, а нашыя рэкламныя даходы скараціліся ў некалькі разоў. Але мы даем рады — з вашай дапамогай. Гэта вы дзеліцеся з намі інфанагодамі, думкамі, досведам, часам, увагай і данатамі.

Праз Patreon. 

З Беларусі — праз Donorbox.

І яшчэ крыптой, тут кашалькі.

Дзякуй, што прачыталі гэтае паведамленне.