Стартап ад беларускі і ўкраінкі на Product Hunt. Ён дапамагае пры пераездзе

Кафаўндаркі праекта — беларуска Каця і ўкраінка Марына, абедзве пераязджалі не раз. Адная з дзяўчат пажыла ў Польшчы, потым на Балі і апынулася ў Бразіліі, другая — ва Украіне, Грузіі, таксама на Балі, а цяпер жыве ў Іспаніі. 

— На Балі мы і пазнаёміліся, — расказвае Каця. — Тады мы абедзве працавалі на іміграцыйным праекце і думалі, як класна было б зрабіць прадукт для тых, хто іміграваў не на ўсё жыццё, а проста пераязджае з краіны ў краіну. 

Бо яму таксама хацелася б разабрацца з падаткамі на месцы ды іншым.

У камандзе цяпер пакуль чатыры чалавекі, бо праект толькі стартаваў. Дзяўчаты распавядаюць, што фронт яны зрабілі на Webflow і кастамным JS, а бэк пакуль рэалізуецца праз Outseta і Google Cloud — «калі ўзляціць, напішам па-сур’ёзнаму».

Пра тое, як дзяўчаты збіраюць і верыфікуюць інфармацыю, яны расказваюць так:

— Мы прыцягваем пазаштатнага эксперта ў краіне, якую даследуем, — і ён піша разам з намі гайд-кіраўніцтва, якія дакументы патрэбныя, каб зрабіць усё самастойна. 

Дадаткова мы прыцягваем аднаго-двух іміграцыйных юрыстаў — вычытаць інфу. Пакуль плануем так і працягваць, потым будзе аддаваць на дадатковую валідацыю кам’юніці.

Каця кажа, што на сайце «ёсць зручныя плашкі, куды карыстальнікі могуць падгрузіць усе патрэбныя дакументы, там жа чат і гайд, плюс ёсць асобная старонка, дзе з’явіцца карта — там будуць усякія кавярні, актыўнасці, арэнда байкаў-машын-дамоў і іншае».