Міністр патлумачыў пагаршэнне мабільнай сувязі на прыкладзе вады ў шматпавярховым доме

Па яго словах, якасць мабільнай сувязі залежыць ад двух галоўных фактараў: прапускной здольнасці сеткі ў канкрэтным пункце, гэта значыць ад колькасці базавых станцый і шчыльнасці іх размяшчэння, а таксама ад нагрузкі на сетку, гэта значыць ад таго, колькі абанентаў і з якой актыўнасцю падключаны да сеткі праз канкрэтную станцыю.

Міністр адзначыў, што ў зваротах грамадзяне скардзяцца на рэзкае пагаршэнне якасці мабільнай сувязі ў канкрэтным населеным пункце.

«Але як яна магла пагоршыцца? Бо ніхто не дэмантуе базавыя станцыі — яны як былі, так і засталіся, — сказаў міністр. — Гэта азначае, што абаненты, якія знаходзяцца бліжэй, чым праблемная зона, да самой базавай станцыі, сталі спажываць больш гэтага рэсурсу. І таму тым, хто знаходзіцца далей, гэтага рэсурсу перастала хапаць», — цытуе Залескага БелТА.

Для нагляднасці ён правёў аналогію з тым, як у суботу ўвечары на апошніх паверхах шматпавярхоўкі не хапае гарачай вады, таму што яна проста туды не даходзіць. Прыкладна тое ж самае, па яго словах, адбываецца з сувяззю.

Рашэнне праблемы ведамства бачыць у будаўніцтве базавых станцый і больш частым іх размяшчэнні па тэрыторыі — і ўжо працуе ў абодвух кірунках. «Нашы меры накіраваны як на максімальнае паскарэнне будаўніцтва новых аб’ектаў інфраструктуры, базавых станцый, антэнна-мачтавых збудаванняў, так і на больш збалансаваную нагрузку на сеткі сотавай сувязі», — адзначыў Залескі.

У 2024 годзе сотавыя аператары пабудавалі больш за 2300 базавых станцый, а іх агульная колькасць перавысіла 40 тысяч. У гэтым годзе ўжо пабудавана каля 2100 базавых станцый, а да канца года агульная колькасць дасягне прыкладна 45 тысяч. Да 2034 года паказчык плануецца прыкладна падвоіць да 80 тысяч.

Залескі прызнаў, што незадаволенасць людзей апраўданая. «Спажыўцу важна не наяўнасць сігналу як такога, а хуткасць і стабільнасць злучэння мабільнага інтэрнэту ў канкрэтным пункце. Менавіта ў гэтым кантэксце мы атрымліваем справядлівыя нараканні, асабліва ў сельскай мясцовасці», — сказаў міністр. Ён дадаў, што спажыванне трафіку мабільнага інтэрнэту ў Беларусі за апошнія 5 гадоў вырасла ў 3 разы і штогод расце прыкладна на 40%. І падкрэсліў, што ў Беларусі даволі нізкія тарыфы на мабільную сувязь, у тым ліку на безлімітны інтэрнэт, і што апошнія тры гады тарыфы не падвышаліся.