Мінюст плануе заблакаваць куплю Figma кампаніяй Adobe
Міністэрства юстыцыі ЗША плануе заблакаваць куплю сэрвісу Figma кампаніяй Adobe за $20 мільярдаў.
Паводле даных крыніц Bloomberg, цяпер ведамства рыхтуе антыманапольны пазоў. Справа будзе распачатая ўжо наступнага месяца, аднак тэрміны могуць змяніцца. Паводле слоў іншай крыніцы, адбылася сустрэча паміж прадстаўнікамі Мінюста і Adobe з гэтай нагоды.
Раней Adobe спрабавала купіць Figma ў 2020 і 2021 годзе. Але толькі ў 2022 годзе Figma прыняла прапанову, завысіўшы ўдвая свой рынкавы кошт. Таксама перад прыняццем прапановы стартап запытваў меркавання ў Microsoft, але карпарацыя не праявіла цікавасці да куплі сэрвісу.
На думку Мінюста, угода ўяўляе сабою адное з найбуйнейшых паглынанняў прыватнага вытворцы софту і можа абмежаваць творчых прафесіяналаў у выбары софту для распрацоўкі. Adobe сцвярджае, што ўгода не ёсць антыканкурэнтнай, бо Figma не канкуруе з прадуктамі кампаніі.
Читать на dev.by