Mistral выпусціла цэлы дзясятак ШІ-мадэляў для ўсяго: ад дронаў да смартфонаў

Галоўнай навінкай стаў буйны мультымадальны і шматмоўны Mistral Large 3. Кампанія сцвярджае, што гэта «найлепшая ў свеце open-weight-мадэль» у сваім класе. Яна арыентаваная на агентныя сістэмы, навуковыя вылічэнні і складаныя карпаратыўныя сцэнарыі. Асобны акцэнт зроблены на падтрымцы розных моў, што Mistral падае як ключавое адрозненне ад амерыканскіх і кітайскіх аналагаў.

Таксама выйшла серыя кампактных мадэляў Ministral 3. Гэтыя сістэмы з 3–14 мільярдамі параметраў можна запускаць на дронах, убудаваных прыладах, аўтамабілях, ноўтбуках і нават ва ўмовах адсутнасці інтэрнэт-доступу. Mistral робіць стаўку на ідэю «размеркаванага інтэлекту», сцвярджаючы, што будучыня ШІ — не толькі ў нарошчванні гіганцкіх мадэляў, але і ў запуску спецыялізаваных сістэм паўсюль.

Кампанія адзначае, што малыя мадэлі выгадней для бізнесу: яны працуюць хутчэй, танней і могуць быць дадаткова навучаны пад вузкія задачы, нярэдка пераўзыходзячы вялікія закрытыя мадэлі. Менавіта вакол кастамізацыі Mistral будуе сваю камерцыйную стратэгію, прапануючы кампаніям сумесную дапрацоўку мадэляў і зніжэнне кошту ўкаранення.

Mistral актыўна набірае абароты: летам кампанія прыцягнула €1,7 мільярда інвестыцый пры ўдзеле ASML і Nvidia і дасягнула ацэнкі €11,7 мільярда. Паралельна стартап заключае буйныя карпаратыўныя кантракты, уключаючы нядаўняе пагадненне з HSBC.

Аднак канкурэнцыя імкліва расце. OpenAI, Google і Anthropic выпускаюць больш магутныя мадэлі класа frontier, а кітайскія DeepSeek і Qwen агрэсіўна развіваюць open-source-падыход. Mistral адказвае на гэта пашырэннем прадуктовай экасістэмы: ад API для агентных сістэм да платформы AI Studio і ўласнага асістэнта Le Chat.