Масква сёння нечым нагадвала Мінск-2020

Сёння раніцай у некаторых расійскіх рэгіёнах аднавілася праблема з мабільным інтэрнэтам, якая назіралася падчас рэпетыцый вайсковых парадаў. У Маскве абмежаванні на працу сувязі павінны былі дзейнічаць з 9:00 да 13:00, але пачаліся ўжо, а 8:30. Учора Telegram-каналы паведамлялі, што абмежаванні інтэрнэту і мабільнай сувязі закрануць 31 рэгіён.

З 5 па 8 мая з многіх рэгіёнаў краіны паступалі паведамленні пра некарэктную працу GPS, перабоі з галасавой сувяззю і затрымкі ў дастаўцы смс-паведамленняў. Сярод наступстваў — расіяне не маглі расплачвацца на касах з дапамогай мабільных тэрміналаў, узніклі цяжкасці са зняццем наяўных у няспраўных банкаматах, з выклікам таксі — кіроўцы не бачылі замовы кліентаў, перасталі адкрывацца шлагбаумы і «разумныя дзверы», якія працуюць праз мабільную сетку, а брыгады хуткай дапамогі без сувязі па дарозе не маглі падлучыцца да медыцынскіх інфармацыйных сістэм.

У Санкт-Пецярбургу ўлады заявілі, што не плануюць абмяжоўваць працу мабільнага інтэрнэту і сувязі. Але параілі грамадзянам загадзя папоўніць рахунак за паркоўку ў цэнтры «на выпадак часовых збояў інтэрнэт-сувязі».

7 мая Дзмітрый Пяскоў заявіў, што расіяне павінны «абсалютна з разуменнем» ставіцца да таго, што ўлады глушаць інтэрнэт. «Гэта не збоі, гэта абмежаванні ў працы мабільнага інтэрнэту па зразумелых прычынах. … Мы павінны ўлічваць тое, скажам так, небяспечнае суседства, якое маем», — сказаў Пяскоў.

Расійскія журналісты адзначаюць, што такія маштабныя абмежаванні працы мабільнай сувязі і інтэрнэту адбываюцца ў краіне ўпершыню.