На літоўскай мяжы рэзка выраслі чэргі, людзі трывожацца
Літоўскі кірунак у пасажыраў аўтобусаў апошнім часам лічыўся адносна спакойным. Перавозчыкі імкнуліся вытрымліваць расклад, і планаваць паездкі было прасцей. Але як паведамляе сэрвіс па продажы білетаў на аўтобусы і маршруткі «Атлас», у апошнія дні сітуацыя змянілася.
У пункце пропуску «Каменны Лог» (з літоўскага боку «Мядзінінкай») нечакана выраслі чэргі з аўтобусаў. Час чакання перасячэння мяжы павялічыўся: у некаторых выпадках рэйсы затрымліваюцца і спазняюцца на 7-10 гадзін. Часам афармленне і наогул спыняецца. У чым прычына, сэрвісу сказаць цяжка, але заклікае ўлічваць гэтыя абставіны пры планаванні паездак.
У пастах сацсетак людзі, якія перасякалі беларуска-літоўскую мяжу, раілі закладваць 24 гадзіны, каб не спазніцца на авіярэйсы, і браць з сабой запас ежы і вады на суткі. «У аўтобусе шмат людзей панікуюць», — расказала адна з пасажырак. Па яе словах, афармленне аднаго аўтобуса займае гадзіну, а падсесці ў легкавушку практычна немагчыма. На перасячэнне мяжы з улікам падсадкі ў адзін з пярэдніх аўтобусаў у яе сышло каля 12 гадзін.
У «Беняконях» (з літоўскага боку «Шальчынінкай») сітуацыя спакойная, адзначае «Атлас». Тут няма чэргаў, аўтобусы рухаюцца строга па раскладзе. Падарожнікам, якія спяшаюцца, раяць выбіраць менавіта гэты маршрут.
Па дадзеных Дзяржпагранкамітэта на 12 гадзін раніцы 6 жніўня, у чарзе ў «Каменным Логу» стаяла 10 аўтобусаў і 60 легкавых аўтамабіляў, у «Беняконях» — 40 легкавушак і ніводнага аўтобуса. У пункце пропуску «Брэст» на мяжы з Польшчай сабралася 2315 легкавушак і 35 аўтобусаў.
Раней беларускія медыя са слоў падарожнікаў пісалі, што стала складаней перасесці ў аўтобусы бліжэй да шлагбаума — перавозчыкі, уключаючы Ecolines і «Мінсктранс», нібыта забаранілі такую практыку, нават за грошы.
Читать на dev.by