Николай Чикишев 13 жніўня 2024, 14:55

На Марсе ўпершыню знайшлі велізарныя запасы вадкай вады

Навукоўцы NASA прааналізавалі звесткі, сабраныя зондам Mars Insight Lander. Даследчыкі прыйшлі да высновы, што пад марсіянскай паверхняй знаходзяцца велізарныя аб’ёмы вадкай вады.

Пакінуць каментарый

На Марсе ўпершыню знайшлі велізарныя запасы вадкай вады

Навукоўцы NASA прааналізавалі звесткі, сабраныя зондам Mars Insight Lander. Даследчыкі прыйшлі да высновы, што пад марсіянскай паверхняй знаходзяцца велізарныя аб’ёмы вадкай вады.

Зонд здзейсніў пасадку на паверхні Марса ў 2018 годзе і працаваў да канца 2022 года. Апарат збіраў сейсмічныя даныя і рэгістраваў страсенні марсавай кары.

На падставе даных аб сейсмічных хвалях навукоўцы рабілі высновы, праз якія асяроддзі тыя праходзяць. Такім жа чынам даследчыкі паступаюць на Зямлі ў пошуках падземных запасаў вады, нафты або газу.

Навукоўцы высветлілі, што на глыбіні ад 10 да 20 кіламетраў пад паверхняй Марса знаходзяцца вялікія аб’ёмы вадкай вады. Раней ваду на Марсе рэгістравалі толькі на полюсах у выглядзе лёду і ў атмасферы ў выглядзе вадзяной пары.

Паверхня Марса з’яўляе сабою суцэльную пустыню, аднак на ёй дагэтуль відаць сляды рэк і азёр. Гэта азначае, што мільярды гадоў таму вадкая вада была і на паверхні.

Аб’ёмаў вады дастаткова, каб пакрыць усю паверхню Марса слоем таўшчынёй большай за паўтара кіламетра. Таксама прысутнасць вады зноў робіць актуальным пытанне пра існаванне жыцця на планеце.

Дабрацца да выяўленых запасаў будзе вельмі няпроста. Для гэтага будучым каланізатарам прыйдзецца свідраваць свідравіну глыбінёй 10 кіламетраў. Пры цяперашнім тэхнічным узроўні касманаўтыкі зрабіць гэта будзе вельмі складана.