На арбіту запусцілі прататып першай прыватнай касмічнай станцыі

Haven Demo быў запушчаны 1 лістапада 2025 года з мыса Канаверал на ракеце SpaceX Falcon 9 у рамках місіі Bandwagon-4. У палёце — 18 карысных нагрузак ад розных заказчыкаў. Апарат правядзе на арбіце каля шасці месяцаў, правяраючы ключавыя сістэмы, якія будуць выкарыстоўвацца на станцыі Haven-1, запуск якой запланаваны на май наступнага года.

Дэманстратар не мае жылога модуля, але абсталяваны рухавіковай устаноўкай, сістэмай навігацыі, сувязі, кіравання палётам і размеркавання энергіі. Гэтыя тэхналогіі Vast мае намер выкарыстоўваць на паўнавартаснай станцыі. Падчас місіі інжынеры таксама пратэстуюць наземную сетку сувязі і сістэму кіравання палётам.

Адной з задач стане праверка аварыйных сцэнараў — у прыватнасці, працы блока размеркавання сілкавання (PDU), які кіруе энергіяй ад сонечных панэляў і акумулятараў, уключаючы сітуацыі з множнымі адмовамі.

Па апошніх дадзеных, апарат паспяхова разгарнуў сонечныя батарэі і працуе штатна. Па завяршэнні місіі яго звядуць з арбіты і накіруюць на кантраляванае згаранне ў атмасферы над паўднёвай часткай Ціхага акіяна.

Калі выпрабаванні пройдуць паспяхова, наступнай вясной Vast выведзе на арбіту станцыю Haven-1. Модуль будзе разгорнуты і падрыхтаваны да эксплуатацыі на працягу 45 дзён, пасля чаго да яго прыстыкуецца карабель SpaceX Crew Dragon з чатырма прыватнымі астранаўтамі. Іх місія працягнецца каля месяца — гэта стане першай у гісторыі экспедыцыяй на цалкам камерцыйную арбітальную станцыю.