Да Месяца стартавала місія NASA Artemis

Жывая трансляцыя запуску вялася на сайце Нацыянальнага ўпраўлення ЗША па аэранаўтыцы і даследаванню камічнай прасторы NASA. Запуск адбыўся са стартавай пляцоўкі 39B касмічнага цэнтра імя Кенэдзі ва Фларыдзе ў 09:48 паводле мінскага часу. Па заканчэнні місіі карабель вернецца на зямлю 11 снежня.

Таксама ў космас выправіліся дзесяць спадарожнікаў-кубсатаў, два манекены і ўсё неабходнае для чатырох біялагічных эксперыментаў: гэта некалькі штамаў грыбоў, насенне, дрожджы і фотасінтэзавальныя водарасці. Раней старт ракеты адкладаўся двойчы праз уцечку вадкага вадароду пры запраўцы першай ступені ракеты-носьбіта і дрэннае надвор’е.

У рамках місіі касмічны карабель выправіцца ў непілатаваным рэжыме да Месяца і прабудзе на яго арбіце некалькі тыдняў. Затым ён вернецца да Зямлі і прывадніцца ў Ціхім акіяне ля берагоў Каліфорніі. Тэставы палёт мае паказаць гатоўнасць ракеты SLS і карабля Orion да выканання пілатаванай місіі.

Ракета SLS распрацаваная кампаніяй Boeing і з’яўляецца наймагутнейшай у свеце. У базавай версіі яна здольная выводзіць на арбіту 95 тон карыснай нагрузкі. Мадыфікацыі ракеты-носьбіта маюць забяспечыць павелічэнне грузападымальнасці да 130 тон. У 2024 годзе плануецца ажыццявіць місію Artemis 2, у рамках якой да Месяца выправіцца экіпаж з чатырох астранаўтаў. Карабель павінны будзе здзейсніць аблёт спадарожніка Зямлі.