Нашто купляць прадукт, а каманду адпраўляць на мароз? Разбіраем кейс Apalon
Свае гіпотэзы выказалі эксперты венчурнага рынку.
Мінскі офіс Apalon закрыюць пасля таго, як інтэлектуальную ўласнасць мацярынскай кампаніі Mosaic Group купіла італьянская ІТ-кампанія Bending Spoons. Умовы ўгоды не раскрываюцца, але, паводле інфармацыі крыніц Bloomberg, Mosaic ацанілі ў $100+ млн. Угоду плануецца закрыць пры канцы гэтага квартала.
Каманда Mosaic Group пакупніку не спатрэбілася, таму яна будзе звольненая. Пад скарачэнне ў лютым-сакавіку падпадае і беларуская каманда Apalon (100+ чалавек).
Але ў чым сэнс набыцця IP без супрацоўнікаў, якія яе абслугоўваюць? Сярод супрацоўнікаў Apalon ходзіць версія, што новыя прадукты спатрэбіліся пакупніку для выхаду на IPO. Мы пагутарылі з экспертамі ў галіне інвестыцый і спыталі іх меркаванне.
«У пакупніка могуць быць свае распрацоўшчыкі, якім перададуць справы»
Кірыл Голуб мяркуе, што сэнсаў можа быць з дзясятак. Напрыклад:
- Самі прадукты (правы на код, дызайн, нейкія спецыяльныя інтэрфейсныя рашэнні, калі яны ёсць і абаронены);
- Старонкі/профілі прадуктаў у сторах (App Store, Google Play) або ў розных маркетплэйсах, лістынгах і да т. п. (калі гэта не мабільныя праграмы) + іх сайты/старонкі на вэб-сайтах;
- Аўдыторыя, якая гэтымі прадуктамі карыстаецца, + патэнцыйная аўдыторыя, якая бачыць / наведвае / неяк інакш узаемадзейнічае з сайтамі/старонкамі гэтых прадуктаў;
- Выручка, якую генеруюць гэтыя прадукты.
Рэальныя ж прычыны знае толькі сам пакупнік. Звальненне супрацоўнікаў можа азначаць толькі тое, што ў пакупніка ёсць свае распрацоўшчыкі, якім старая каманда проста перадасць справы.
«Купля перад IPO? Цалкам лагічна»
Некалькі версій і ў Ігара Маханька.
— Тут можа быць шмат варыянтаў. Напрыклад, у пакупніка вялікая каманда ўжо ёсць, на цяперашніх прадуктах задач недастаткова, і такім чынам (з дапамогай куплі дадатковых прадуктаў без каманды) можна пазбегнуць лэй-офаў. Магчыма, прадукты Apalon настолькі mature, што не патрабуюць вялікай каманды для развіцця і падтрымкі.
Да таго ж мы не ведаем, наколькі прыбытковым быў Apalon: магчыма, пакупнік не бачыў сэнсу ў пагадненні, калі б атрымліваў не толькі прыбыткі ад праграм, але і выдаткі на заробкі.
Можа быць і такое, што пакупніку патрэбныя не столькі праграмы Apalon, колькі карыстальнікі, якіх яны змогуць перанакіраваць на іншыя свае праграмы.
Угода ў цэлым незвычайная: купілі IP без людзей. Але яна лагічная ў тым ключы, што 2023 і 2024 — гэта гады павелічэння прадукцыйнасці работнікаў і памяншэння памеру каманд. І гэта цікавы падыход — аб’яднаць дзве кампаніі па колькасці працы, але не па колькасці работнікаў.
Купля перад IPO? Цалкам лагічна: павялічыць рэвен’ю, не павялічваць костаў.
«Можа, у нармальны час кампанія каштавала „ярд“»?
Валер Астрынскі выказаў здагадку, што кампанія ў складаны перыяд памяншае выдаткі і распрадае напрамкі, якія не генеруюць прыбытку.
— Для пакупніка інтэлектуальная ўласнасць без каманды мае сэнс, калі пакупка вельмі танная, — кажа Валерый. — Вы пішаце, што Mosaic ацанілі ў $100+ млн. Але можа, у нармальны час гэтая кампанія каштавала «ярд»? Што да звальненняў: скарачэнні ў ІТ ідуць ва ўсім свеце, і ў першую чаргу кампаніі пазбаўляюцца затратных і таксічных актываў.
«Звальняючы каманду, робяць літаральна cash cow»
А вось Юрый Мельнічак лічыць, што інтэлектуальная ўласнасць Mosaic Group для новых уладальнікаў можа быць накшталт cash cow.
— Калі памеркаваць кошт угоды ў $100-200M (у навінах пішуць «> $100M»), то гэта дзесьці 1-3 гадавыя выручкі праграм Apalon. Фактычна купляюць праграмы, ацэньваючы іх па discounted cash flow.
Звальняючы каманду, робяць літаральна cash cow. Зразумела, што са звольненай камандай праграмы перастануць развівацца.
Таму мой прагноз: яшчэ і манетызацыю ў саміх праграмах выкруцяць на максімум, каб зняць пабольш грошай c праграм, якія будуць паступова загінацца.
Мяркуючы па чутках пра будучы IPO Bending Spoons, гэта яшчэ і карысна, каб падняць карыстальніцкую базу, выручку і, адпаведна, кошт кампаніі на IPO.
Для нас у Rainbow гэтая ўгода, вядома, выдатная навіна. Мінус два канкурэнты — Clime і Weather Live (праграмы пра надвор’е Араlon — dev.by). Да таго ж вызваліліся людзі, якіх патэнцыйна можна наняць.
Дарэчы, хто хоча ў нас працаваць, напішыце Аляксандру Мацвеенку на am@rainbow.ai.
Чытачы! Мы перажылі яшчэ адзін складаны год. У 2023 нашая каманда працягвала сачыць за беларускім ІТ і трымала вас у курсе самага важнага.
Без вас у нас бы не атрымалася! Вы дзеліцеся з намі досведам і інсайдамі, расказваеце гісторыі, смешныя і сумныя, ствараеце дыскусіі — робіце ўсё, каб беларускае ІТ працягвала жыць, нягледзячы на межы і адлегласці. dev.by быў і застаецца месцам сустрэчы нашых чытачоў, дзе б яны не знаходзіліся.
Мы працягваем працаваць, у тым ліку дзякуючы вам. У 2023 нам заданацілі 678 чалавек. Гэта неверагодна кранальна і моцна дапамагае нам працаваць далей і верыць у будучыню dev.by. Але нам усё яшчэ патрэбная падтрымка. Вашыя данаты дапамагаюць выплачваць заробкі журналістам.
Даб’ём да 700?
Падтрымайце нас:
— Праз Patreon
— Праз Donorbox (калі вы ў Беларусі)
— Крыптой, тут гаманцы.
Дзякуй!
Читать на dev.by