Мільярдэр Уінод Госла, які інвеставаў у OpenAI ды іншыя вядомыя стартапы, шукае памочніка на тры гады. Ад кандыдата патрабуецца працаваць па 12 гадзін у офісе і быць на сувязі ўначы і ў выходныя.
Мільярдэр Уінод Госла, які інвеставаў у OpenAI ды іншыя вядомыя стартапы, шукае памочніка на тры гады. Ад кандыдата патрабуецца працаваць па 12 гадзін у офісе і быць на сувязі ўначы і ў выходныя.
«Калі вам патрэбен прадказальны графік, дакладныя інструкцыі ці пастаяннае кіраўніцтва — гэтая праца не для вас», — папярэдзіў у LinkedIn віцэ-прэзідэнт Khosla Ventures па падборы персаналу Раян Батра. Новы супрацоўнік будзе непасрэдна працаваць з Гослам: ацэньваць патэнцыяльныя інвестыцыі, узаемадзейнічаць з заснавальнікамі стартапаў, вывучаць новыя тэхналогіі і ўдзельнічаць у стратэгічных рашэннях.
«Вы не будзеце разбірацца ва ўсіх галінах, якімі я займаюся. Важна, наколькі хутка вы вучыцеся, якія пытанні задаяце і ці ўмееце мысліць ад першых прынцыпаў», — растлумачыў Госла. Пазней інвестар удакладніў патрабаванні да графіка. «Калі адкінуць жарты, праўда ў тым, што ў гэтай працы няма канкрэтных патрабаванняў па гадзінах, але яна інтэнсіўная. Я працую 80 гадзін на тыдзень, і гэтаму чалавеку давядзецца за мной паспяваць», — напісаў ён у X.
Вакансія выклікала спрэчкі. Сузаснавальнік Reddit Алексіс Аганян назваў яе магчымасцю, здольнай змяніць жыццё, а кіраўнік 37signals Джэйсан Фрыд, які звычайна крытыкуе культуру перапрацовак, адзначыў, што працадаўца хаця б сумленна абазначыў чаканні. «Каб мне было 25, магчыма, гэта была б найлепшая праца ў свеце», — сказаў Фрыд.
На фоне буму ШІ падобныя патрабаванні становяцца ўсё больш прыкметнымі. Некаторыя заснавальнікі стартапаў прытрымліваюцца графіка «996» — з 9 раніцы да 9 вечара шэсць дзён на тыдзень. Страхавы стартап Corgi правярае вынослівасць кандыдатаў шматдзённымі працоўнымі выпрабаваннямі, часам у выходныя. А LemonLime прапаноўвала суразмоўе ўдзельнікам мерапрыемства, якія згадзіліся зрабіць татуіроўку з лагатыпам кампаніі.
Памер заробка памочніка Гослы не раскрываецца. Для параўнання, паводле дадзеных Indeed, медыянный прапанаваны заробак кіраўнікоў апарату ў раёне Сан-Францыска складае $175 тысяч у год. Нягледзячы на жорсткія ўмовы, кампанія чакае больш за тысячу водгукаў. Былы памочнік Гослы Гесам Мотлаг, які займаў пасаду з 2021 па 2023 год, назваў гэтую працу «неймаверным вопытам навучання».
Релоцировались? Теперь вы можете комментировать без верификации аккаунта.