Нямецкі суд абавязаў X даць звесткі даследчыкам перад выбарамі

Рашэнне было прынятае ў адказ на тэрміновы пазоў, пададзены дзвюма групамі па абароне грамадзянскіх правоў: Нямецкага таварыства грамадзянскіх правоў (GFF) і Democracy Reporting International (DRI). Арганізацыі заявілі, што ім патрэбныя звесткі для адсочвання дэзынфармацыі напярэдадні нацыянальных выбараў у Германіі 23 лютага.

Згодна з рашэннем суда, X мае даць доступ да звестак пра публікацыі, рэпосты і падабайкі, якія звычайна даступныя карыстальнікам. Суд падкрэсліў, што затрымка з доступам да звестак перашкодзіла б даследаванню, паколькі перыяд непасрэдна перад выбарамі мае вырашальнае значэнне. X не адказала на запыт суда, кампанія абавязаная аплаціць судовыя выдаткі ў памеры 6000 еўра.

Еўрапейская камісія таксама расследуе X па падазрэнні ў парушэнні Закона «пра лічбавыя паслугі» (DSA), які абавязвае платформы даваць даследчыкам доступ да звестак. Расследаванне можа прывесці да штрафаў або нават блакавання доступу да платформы ў рэгіёне.  Акрамя таго, пракуратура Парыжа адкрыла ўласнае расследаванне ў дачыненні да X па падазрэнні ў алгарытмічнай перадузятасці на скаргу сябра французскага парламента.

Раней Ілан Маск, уладальнік X, адкрыта выказваў падтрымку вельмі правай партыі» Альтэрнатыва для Нямеччыны " (AfD), якая займае другое месца ў апытаннях. Ён напісаў у снежні, што «толькі AfD можа выратаваць Германію» і правёў прамую трансляцыю з сустаршынёй партыі Алісай Вайдэль.