Xbox у выглядзе вядра і планы на The Elder Scrolls: што мы даведаліся з уцечкі Microsoft

У ліпені гэтага года амерыканскі суд ухваліў угоду паміж Microsoft і Activision Blizzard. Ад таго часу кампаніі рэдагавалі дакументы, прыбіраючы адчувальную для бізнэсу інфармацыю, перад тым, як суд апублікуе іх для грамадскасці. Аднак Федэральная гандлёвая камісія ЗША (FTC) забылася выдаліць важныя дадаткі да дакументаў Microsoft, перш як апублікаваць іх у сеціве. У апублікаваных матэрыялах гаворка ідзе пра планы кампаніі ў гульнявой індустрыі і фінансавыя паказчыкі.

Лінейка новых Xbox

Згодна з уцечкай, новая кансоль Xbox series X пад кодавай назвай Brooklin выйдзе ў лістападзе 2024 года. Прылада будзе абсталяваная пярэднім портам USB-C з Power Delivery, 2 ТБ убудаванай памяці, Wi-Fi 6E і падтрымкай Bluetooth 5.2. Кансоль атрымае больш цыліндрычны дызайн, «абсалютна новы геймпад» і блок сілкавання са зніжанай на 15% магутнасцю. Прылада будзе прадавацца без дыскавода па арыенціровачным кошце ў $499.

Геймпад пад кодавай назвай Sebille будзе выкананы ў двухколернай гаме, атрымае адаптыўныя трыгеры, як у PlayStation 5. У дакуменце сказана пра «прэцызійную тактыльную зваротную сувязь» і «тактыльную сістэму VCA, падвоеную ў якасці дынамікаў». Гаджат будзе мець цішэйшыя кнопкі і перазараджальны зменны акумулятар. Прылада зможа падтрымліваць прамое падключэнне да воблака. Sebille таксама атрымае модуль Bluetooth 5.2.

Таксама ёсць даныя пра Xbox наступнага пакалення: вытворца плануе, каб кансоль выкарыстоўвала ўсе магчымасці воблачных тэхналогій, што дазволіць абысці абмежаванні ў магутнасці. Акрамя таго, кампанія плануе пераходзіць на архітэктуру ARM.

Цэны на гульні

Даступнымі сталі фінансавыя паказчыкі гейм-напрамкі Microsoft. У табліцы з патэнцыяльнымі навінкамі Game Pass пазначаны гульні, якія маюць запоўніць прабел пасля пераносу найбуйнейшага рэлізу кампаніі — гульні Starfield — з 2022 года на пазнейшы тэрмін. У дакуменце пазначаныя меркаваны кошт дадання гульні ў сэрвіс, верагоднасць завяршэння ўгоды, «ваў-фактар» праекта і іншыя заўвагі.

Напрыклад, самыя патэнцыйна дарагія гульні ў табліцы — Star Wars Jedi: Survivor ($300 мільёнаў), Mortal Kombat 1 ($250 мільёнаў), Suicide Squad: Kill the Justice League ($250 мільёнаў). За імі ідуць Assassin’s Creed Mirage ($100 мільёнаў) і Dying Light 2 Stay Human (больш за $50 мільёнаў). Цікава, што Grand Theft Auto V ацанілі ў $12-15 мільёнаў на месяц, а Baldur’s Gate 3 і ўвогуле ў $5 мільёнаў.

У перапісцы генеральны дырэктар Microsoft Gaming Філ Спенсер назваў сітуацыю з буйнымі рэлізамі Xbox у 2022 годзе сапраўднай катастрофай і прапаноўваў запоўніць прабел трылогіяй Dark Souls, відаць, улічваючы поспех Elden Ring. Фэнтэзійную Larian Studios ў Microsoft ацанілі ў $5 мільёнаў, назваўшы яе «RPG другога прагону».

У дакументах знайшоўся спіс рэлізаў студыі Bethesda на найбліжэйшыя гады: Fallout 3 Remaster, Ghostwire Tokyo Sequel, Dishonored 3, Oblivion Remaster і Doom Year Zero выйдуць пасля 2024 года. Хутчэй за ўсё, The Elder Scrolls VI з’явіцца пасля 2026 года. Чакаецца, што гульня будзе эксклюзіўнай для Microsoft і не будзе даступная на PlayStation.

Гейм-даходы

Журналісты таксама знайшлі статыстыку продажаў кампаніі. Напрыклад, гульні Fallout 4. У 2015 годзе Bethesda паведаміла, што ў дзень рэлізу ролевая гульня была прададзеная накладам у 12 мільёнаў копій па ўсім свеце. Пасля гэтага студыя не публікавала дакладнай дынамікі продажаў. Ва ўцечцы паказана, што ў 2020 годзе было прададзена каля 25 мільёнаў копій гульні.

Таксама ў дакуменце згадваецца, што ў 2020 годзе The Elder Scrolls V: Skyrim была прададзеная накладам каля 40 мільёнаў копій. Аднак стваральнік гульні Тод Говард заяўляў, што па ўсім свеце было прададзена больш за 60 мільёнаў копій. Гэта азначае, што ролевая гульня прадалася накладам яшчэ прыкладна 20 мільёнаў копій за тры гады.

Кіраўнікі Microsoft летась прадугледжвалі рост напрамку гульняў за кошт рэкламы і мабільных пакупак на працягу некалькіх гадоў. Паводле прагнозаў кампаніі, даход ад гульняў падвоіцца да $36 мільярдаў у 2030 годзе замест $16,23 мільярда ў 2022 годзе. Гэта адбудзецца ў тым ліку дзякуючы паглынанню Activsion Blizzard: павялічацца продаж транзакцый на кансолях і ПК, кампанія зможа прыцягнуць больш падпісчыкаў у Game Pass.

Барацьба з канкурэнтамі

Унутраную кухню кампаніі паказала перапіска Філа Спенсера з іншымі менеджэрамі. Яна паказала, што Microsoft працавала над даданнем ПК-гульняў у Xbox Cloud Gaming — так кампанія спрабавала канкураваць са стрымінгавым сэрвісам Google Stadia, які закрыўся ў 2022 годзе. Сітуацыю абмяркоўваў кіраўнік Microsoft Сацья Надэла з кіраўнікамі аддзелаў: Xbox Філам Спенсерам, воблачнага геймінгу Карымам Чоўдры і кіраўніцай аддзела па працы са стваральнікамі (head of Xbox creator experience) Сарай Бонд.

Падзеі адбываліся пасля запуску і падчас тэсціравання Google Stadia ў ліпені 2021 года. Надэла перажываў, што ў канкурэнтаў больш досведу ў віртуальных машынах Linux і патокавых трансляцыях. Ён пацікавіўся ў падначаленых, ці не могуць яны зрабіць тое ж самае для ПК Game Pass? Спенсер адказаў, што ў Microsoft будзе магчымасць зэканоміць і выкарыстоўваць наяўныя магутнасці воблачнага сэрвісу Azure.

Аднак закрыццё Google Stadia астудзіла запал: пасля таго, як сэрвіс афіцыйна закрыўся каля года таму, ідэя дадаць ПК-гульні ў Xbox Cloud Gaming не атрымала працягу. Як і развіццё сэрвісу. Няўдалая гейм-платформа канкурэнтаў з часам стала мемам: абмяркоўваючы рэліз Baldur’s Gate 3, супрацоўнікі называлі яе «другараднай RPG для Stadia», значна недаацаніўшы гульню.

Уцечка GitHub

Паралельна з уцечкай з суда ўсплылі падрабязнасці іншай хібы, ужо саміх супрацоўнікаў Microsoft. Спецыялісты кампаніі Wiz Research, якая спецыялізуецца на забеспячэнні бяспекі воблачных вылічэнняў, выявілі адкрыты рэпазіторый Git Hub, які належыць Microsoft. Ва ўліковым запісе быў набор навучальных даных, адкрыты код і АІ-мадэлі для распазнавання выяў. Акаўнт належаў падраздзяленню кампаніі, якое займаецца даследаваннямі ў галіне АІ.

URL-адрас быў наладжаны на прадастаўленне правоў «поўнага кантролю» на ўвесь уліковы запіс. Гэта прывяло да раскрыцця канфідэнцыйных даных аб’ёмам 38 ТБ, у тым ліку асабістых рэзервовых копій камп’ютараў двух супрацоўнікаў Microsoft. Уліковы запіс не быў адкрыты напрамую, але распрацоўшчыкі ўключылі ў URL дазвольны токен подпісы агульнага доступу SAS. Гэты механізм дазваляе ў воблачным сховішчы Azure ствараць падзяляльныя спасылкі, якія прадастаўляюць доступ да даных уліковага запісу Azure Storage.

У сховішчы была і іншая канфідэнцыйная інфармацыя, напрыклад, паролі да сэрвісаў Microsoft, сакрэтныя ключы і больш за 30 тысяч унутраных паведамленняў ад сотняў супрацоўнікаў у Microsoft Teams. Wiz паведаміла аб уцечцы Microsoft 22 чэрвеня, праз два дні токен SAS быў адкліканы. Расследаванне патэнцыйных наступстваў завяршылася 16 жніўня. Кампанія прыйшла да высновы, што даныя кліентаў не былі раскрытыя, іншыя ўнутраныя службы не падвергліся рызыцы праз уцечку. Яна адбылася, калі супрацоўнікі спрабавалі апублікаваць набор навучальных даных на GitHub.