Nvidia: Google добрая, але мы на пакаленне наперадзе

«Мы радыя поспеху Google — яны моцна прасунуліся ў ШІ, і мы працягваем пастаўляць ім нашую прадукцыю», — адзначылі ў кампаніі Джэнсена Хуанга. Там дадалі, што Nvidia апераджае галіну на цэлае пакаленне і што гэта адзіная платформа, якая запускае кожную ШІ-мадэль і робіць гэта ўсюды, дзе вядуцца вылічэнні. Карыстальнікі пад пастом адзначылі, што тэхнагіганты проста перакідваюць паміж сабой мільярды — маўляў, гэта не сапраўдны попыт, не сапраўдныя продажы, і тое ж самае датычыцца вартасці гэтых кампаній.

Паст з’явіўся ў Х учора пасля паведамлення The Information аб тым, што Meta абмяркоўвае з Google шматмільярдную ўгоду па куплі яе чыпаў для сваіх дата-цэнтраў. На фоне публікацыі акцыі Nvidia да сярэдзіны дня ўпалі больш чым на 3%.

У Google у каментарыі Business Insider адказалі, што маюць намер далей падтрымліваць абодва тыпы чыпаў — фірмовыя тэнзарныя працэсары і GPU Nvidia, — таму што на абодва расце попыт.

Google узляцела пасля рэлізу новай сям'і мадэляў Gemini 3. Яе катыроўкі дасягнулі рэкордных значэнняў, а рынкавая капіталізацыя наблізілася да $4 трлн.