Uber наймае кіроўцаў з гісторыяй гвалтоўных злачынстваў

У сваіх маркетынгавых матэрыялах Uber сцвярджае, што бяспека пасажыраў забяспечваецца за кошт абавязковага бэкграунд-чэка. Аднак, як высветліла выданне, сістэма праверкі была пабудавана такім чынам, каб паскорыць падключэнне кіроўцаў да платформы і скараціць выдаткі, а не максімальна адсейваць патэнцыйна небяспечных кандыдатаў.

Паводле расследавання, Uber аўтаматычна адхіляе кіроўцаў, асуджаных за забойства, сэксуальнае гвалтаванне, выкраданне людзей і тэрарызм. Але ў 22 штатах ЗША кампанія дапускае да працы людзей, асуджаных за большасць іншых гвалтоўных злачынстваў, уключаючы збіццё, пераслед і жорсткае абыходжанне з дзецьмі, — калі прысуд быў вынесены больш за сем гадоў таму.

Праверкі таксама маюць істотныя прабелы. У 35 штатах Uber аналізуе крымінальную гісторыю кандыдата толькі па месцах яго пражывання за апошнія сем гадоў. У выніку злачынствы, здзейсненыя раней або ў іншых штатах, могуць не трапіць у справаздачу і застацца незаўважанымі.

Унутраныя дакументы кампаніі паказваюць, што кіраўніцтва Uber свядома абмяркоўвала магчымасць зрабіць праверкі больш жорсткімі, але ў выніку адмовілася ад гэтага кроку. Адным з аргументаў была асцярога, што больш строгія патрабаванні запаволяць набор кіроцаў і павялічаць аперацыйныя выдаткі.

У перапісцы 2018 года тагачасны кіраўнік па камунікацыях у сферы бяспекі Uber Брук Андэрсан прама прызнала абмежаванні існуючай сістэмы. «Мы дакладна не робім усё магчымае», — напісала яна, каментуючы дзеючыя працэдуры праверкі кіроўцы.

Расследаванне апублікавана на фоне абвінавачванняў з боку пасажыраў, якія заяўлялі аб сэксуалізаваным гвалце з боку кіроўцаў Uber. Паводле дадзеных выдання, у шэрагу такіх выпадкаў у кіроўцаў раней былі судзімасці за гвалтоўныя злачынствы, якія не перашкодзілі ім атрымаць доступ да платформы.