OpenAI гатовая набыць Chrome, але супраць падзелу Google. Тая не хоча супрацоўнічаць

Кіраўнік аддзела прадукту ChatGPT Нік Тэрлі зрабіў гэтую заяву падчас судовага пасяджэння, падкрэсліўшы, што такое набыццё дазволіць OpenAI прапанаваць карыстальнікам «неверагодны» досвед. Адным з прапанаваных рашэнняў Міністэрства юстыцыі ЗША з’яўляецца падзел Google, уключаючы прымусовы продаж браўзера Chrome.

Паводле слоў Тэрлі, шмат іншых кампаній таксама будуць зацікаўленыя ў набыцці Chrome, улічваючы яго дамінуючае становішча на сусветным рынку браўзераў, дзе ён займае больш за 67%. Safari займае другое месца з амаль 18%, Microsoft Edge — 5,2%, а Firefox — 2,54%.

Суддзя Аміт Мехта раней прызнаў Google манапалістам у галіне анлайн-пошуку і звязанай з ім рэкламы. Цяпер суд разглядае магчымыя сродкі прававой абароны. Google, у сваю чаргу, плануе абскардзіць рашэнне аб сваім манапольным становішчы.

Акрамя таго, падчас слухання высветлілася, што OpenAI яшчэ ў мінулым годзе спрабавала наладзіць партнёрства з Google для інтэграцыі пошукавых тэхналогій карпарацыі ў ChatGPT. Паводле Тэрлі, кампанія звярталася да Google з-за «значных праблем з якасцю» ў свайго цяперашняга пастаўшчыка пошуку Bing ад Microsoft.

У электронным лісце, прадстаўленым у судзе, OpenAI выказвала ўпэўненасць, што «наяўнасць некалькіх партнёраў, і ў прыватнасці API Google, дазволіла б нам надаваць лепшы прадукт карыстальнікам». Аднак Google адхіліла прапанову OpenAI ў жніўні 2024 года, спаслаўшыся на тое, што гэта ўцягне занадта шмат канкурэнтаў.

Аналітыкі мяркуюць, што цікавасць OpenAI да Chrome абумоўленая не толькі патрэбай у якасным пошуку, але і імкненнем да прамога доступу да карыстальнікаў і іх дадзеных. Раней OpenAI таксама разглядала магчымасць распрацоўкі ўласнага вэб-браўзера і нават наняла былых распрацоўшчыкаў Chrome Бэна Гуджэра і Дарына Фішэра.

Таксама суд выклікаў для дачы паказанняў генеральнага дырэктара Perplexity Аравінда Шрыніваса. Той заявіў у X, што мае намер засведчыць, што «Chrome павінен заставацца ў межах Google і па-ранейшаму кіравацца ёю», але Android павінен стаць «больш адкрытым для выбару спажыўцоў».

«Мы не верым, што хто-небудзь яшчэ зможа запусціць браўзер у такім маштабе без шкоды для якасці або бізнес-мадэлі, якая зможа з прыбыткам абслугоўваць такую колькасць карыстальнікаў, захоўваючы браўзер бясплатным», — напісаў Шрынівас.