Выручка найбуйнейшых AI-кампаній імкліва расце, але амаль увесь рынак засяроджаны вакол OpenAI і Anthropic. Аднак іх будучая прыбытковасць застаецца пад пытаннем праз вялікія выдаткі на вылічэнні і ціску на кошты.
Выручка найбуйнейшых AI-кампаній імкліва расце, але амаль увесь рынак засяроджаны вакол OpenAI і Anthropic. Аднак іх будучая прыбытковасць застаецца пад пытаннем праз вялікія выдаткі на вылічэнні і ціску на кошты.
Паводле звестак The Information, 34 галоўныя AI-стартапы атрымліваюць каля $80 млрд гадавой выручкі. За паўгода гэты паказчык вырас на 112%. Аднак 89% агульнай сумы прыпадае на дзве кампаніі — OpenAI і Anthropic. Выданне адзначае, што Anthropic нядаўна перасягнула OpenAI па выручцы дзякуючы павышанаму попыту на Claude Code і іншыя інструменты для праграмавання.
Па-за межамі двух лідараў рынак істотна саступае. Сярод кампаній з выручкай звыш $500 млн у год называюць Perplexity, ElevenLabs і Cognition. Інвестары накшталт Sequoia лічаць, што асноўная вартасць AI-рынку пакуль належыць распрацоўшчыкам базавых мадэляў, а не стваральнікам прыкладанняў на іх аснове.
Але высокая выручка не гарантуе ўстойлівую прыбытковасць. Anthropic дзеліцца часткай даходу з Amazon і Google, а OpenAI да 2030 г. павінна пералічваць Microsoft 20% выручкі. Пры гэтым Anthropic і OpenAI сумарна трацяць больш за $30 млрд штогод, пераважна на навучанне мадэляў і вылічальную інфраструктуру.
The Register заўважае, што маржа буйных AI-кампаній можа аказацца значна ніжэйшай за чаканні інвестараў. Сёння падпіскі і карпаратыўныя кантракты часта ўспрымаюцца як праграмны бізнес з высокай маржай, але рэальныя выдаткі на навучанне і інферэнс робяць эканоміку значна складанейшай.
Адзін з прыкладаў — AI-інструменты для распрацоўшчыкаў. Падпісчык Claude Code за $200 у месяц можа спажываць токенаў на суму, эквівалентную прыкладна $5000 паводле API-тарыфаў. OpenAI, як піша выданне, таксама нясе страты на частцы падпісак. Таму Anthropic, OpenAI, Google і Microsoft усё актыўней пераводзяць кліентаў на аплату па фактычным выкарыстанні, калі выдаткі залежаць ад абʼёму токенаў.
Рост коштаў можа падштурхнуць кліентаў да больш танных альтэрнатываў. Аналітык Бэнэдыкт Эванс лічыць, што AI-мадэлі паступова стануць інфраструктурным таварам: базавыя мадэлі будуць дастаткова якаснымі і ўзаемазамянальнымі, а цэнавая ўлада змесціцца вышэй — да прыкладанняў, інтэрфейсаў, аперацыйных сістэм і воблачных платформаў.
Гэта рызыка ўжо назіраецца на рынку распрацоўкі. Кампаніі і незалежныя распрацоўшчыкі выкарыстоўваюць AI пераважна не для самых складаных даследчых задач, а для тыповых сцэнароў, аўтаматызацыі і эксперыментаў з агентамі. Для такіх задач ім не заўсёды патрэбная самая дарагая мадэль. Адкрытыя мадэлі накшталт GLM, Kimi, DeepSeek і Qwen ужо могуць задавальняць частку менш складанай распрацоўкі, а некаторыя з іх працуюць лакальна на адпаведным абсталяванні.
The Register таксама звартае ўвагу на шэры рынак таннага доступу да токенаў. Даследчыца Цзылянь Цянь з Oxford China Policy Lab пісала, што распрацоўшчыкі ў Кітаі атрымліваюць доступ да амерыканскіх мадэляў праз API-праксі, нягледзячы на геаблокіроўкі, праверкі тэлефонаў, плацежных картак і KYC. Гэта дэманструе, наколькі цяжка буйным AI-кампаніям захоўваць эксклюзіўнасць мадэляў, кантраляваць доступ і трымаць высокую маржу.
У бліжэйшай перспектыве OpenAI і Anthropic застаюцца галоўнымі бенефіцыярамі AI-буму. Яны забіраюць большасць выручкі, дамінуюць у карпаратыўных інтэграцыях і асабліва моцныя ў катэгорыі кадавання — сферы, за якую кампаніі ўжо гатовы плаціць. Па звестках Andreessen Horowitz, штогадовыя карпаратыўныя выдаткі на AI-інструменты для праграмавання дасягнулі каля $3 млрд, у той час як у юрыдычных, медычных і кліенцкіх сцэнарыях расходы значна ніжэйшыя.
Доўгатэрміновая рызыка ў тым, што мадэлі могуць значна падзешавець і пераўтварыцца ў практычна ўзаемазамяняльную інфраструктуру — як хмарныя серверы ці плацяжы за API. Тады асноўны прыбытак будуць атрымліваць не распрацоўшчыкі мадэляў, а кампаніі, праз якія карыстальнікі да іх звяртаюцца: Apple, Google і Microsoft — праз аперацыйныя сістэмы і прылады, а Amazon, Google і Microsoft — праз воблачныя платформы. Грошы могуць перамясціцца ад распрацоўшчыкаў мадэляў да тых, хто кантралюе дыстрыбуцыю і інфраструктуру.
Релоцировались? Теперь вы можете комментировать без верификации аккаунта.