OpenAI перанесла запуск GPT Store з кастамными версіямі чат-бота на 2024 год

У лісце пазначана, што запуск GPT Store адкладаецца на пачатак наступнага года. Першапачаткова планавалася, што анлайн-крама будзе запушчаная пры канцы гэтага года. «Хоць усе мы чакалі рэліз у гэтым месяцы, некалькі нечаканых падзей адцягнулі нас», — цытуе дакумент The Verge. Пакуль дзяліцца сваімі версіямі бота можна толькі з дапамогай прамых спасылак.

Улетку гэтага года СМІ пісалі, што OpenAI разглядае магчымасць стварэння анлайн-платформы, на якой распрацоўшчыкі змогуць прадаваць уласныя мадэлі АІ, настроеныя для канкрэтных мэтаў. Меркавалася, што для стварэння кастамных мадэляў не спатрэбіцца ведаў праграмавання. OpenAI паабяцала выплачваць частку выручкі за прадукты, якія карыстаюцца найбольшым попытам у карыстальнікаў.

Маркетплэйс OpenAI павінен дапамагчы АІ-стартапам выйсці на канкурэнтны рынак, які актыўна развіваецца і цяпер заняты ў асноўным буйнымі кампаніямі. На планы запуску крамы паўплывала нечаканае звальненне Сэма Альтмана з пасады гендырэктара кампаніі. У выніку Альтман змог вярнуцца ў кампанію і абнавіць склад рады дырэктараў.