OpenAI прыдумала новы камітэт па бяспецы АІ і не ўключыла туды Альтмана

Новая структура атрымала права прыпыняць рэлізы АІ-мадэляў з меркаванняў бяспекі. У камісію ўвайшлі Зіка Колтэр, Адам д’Анджэла, Пол Накасонэ, Ніколь Селігман, якія таксама ўваходзяць у склад рады дырэктараў кампаніі. Пры гэтым у спісе сяброў няма гендырэктара OpenAI Сэма Альтмана.

Камісія ўжо правяла праверку бяспекі новай мадэлі o1. Орган разам з радай дырэктараў будзе ажыццяўляць нагляд за распрацоўкай новых АІ-мадэляў. Рада дырэктараў будзе атрымліваць перыядычныя брыфінгі ў пытаннях бяспекі сістэм.

Змены ў структуры кампаніі адбыліся пасля таго, як стартап пазбавіўся амаль паловы супрацоўнікаў, якія адказвалі за доўгатэрміновыя рызыкі АІ. Многія з іх перайшлі ў Safe Superintelligence — стартап аднаго з заснавальнікаў OpenAI Іллі Суцкевера, які раней таксама звольніўся з кампаніі.

Паводле даных СМІ, OpenAI рыхтуецца да новага раўнда фінансавання ў памеры каля $6,5 мільярда пры ацэнцы кампаніі ў $150 мільярдаў. Для павышэння кошту на рынку кіраўніцтва стартапа плануе цалкам змяніць карпаратыўную структуру кампаніі і адмовіцца ад некамерцыйнага складніка.