OpenAI выпусціла мадэлі з адкрытымі вагамі ўпершыню за 5 гадоў

Мадэляў дзве: gpt-oss-120b і gpt-oss-20b на 120 млрд і 20 млрд параметраў адпаведна. Меншая можа працаваць на большасці настольных ПК і ноўтбуках, а большая прызначана для больш магутнага абсталявання. Мадэлі распаўсюджваюцца па ліцэнзіі Apache 2.0, гэта значыць іх можна мадыфікаваць і выкарыстоўваць у камерцыйных мэтах.

Паводле слоў гендырэктара стартапа Сэма Альтмана, гэта лепшыя і самыя зручныя адкрытыя мадэлі ў свеце. Вынікі gpt-oss-120b амаль параўнальныя з o4-mini — адной з самых прасунутых мадэляў OpenAI — на ключавых бэнчмарках, і яна можа працаваць на адным графічным працэсары з 80 Гб памяці. Малодшая версія блізкая да o3-mini і патрабуе 16 Гб памяці.

Папярэдняй мадэллю з адкрытымі вагамі, якую выпусціў стартап, была GPT-2 у 2019 годзе. Распрацоўшчыкі спадзяюцца, што рэліз gpt-oss будзе садзейнічаць новым даследаванням і з’яўленню інавацыйных прадуктаў.