OpenAI запускае «забойцу сацсетак» — ChatGPT Pulse

Як тлумачыць OpenAI, сэрвіс будзе працаваць, пакуль чалавек спіць. Сістэма збірае падборку з пяці–дзесяці кароткіх зводак, якія можна праглядзець адразу пасля абуджэння. Чат-бот фармуе «карткі» з тэкстам і ілюстрацыямі, якія можна адкрыць для падрабязнай справаздачы ці ўдакладніць дэталі проста ў дыялогу з ChatGPT.

Тэмы могуць быць як агульнымі — напрыклад, навіны пра спартыўную каманду, — так і персаналізаванымі. Pulse выкарыстоўвае падключаныя сэрвісы кшталту Google Calendar і Gmail, каб складаць расклад ці вылучаць важныя лісты, а таксама абапіраецца на памяць ChatGPT для ўліку інтарэсаў і перавагаў карыстальніка.

Асаблівасцю прадукту з’яўляецца абмежаванасць па часе: пасля некалькіх картак Pulse завяршае падборку паведамленнем «На сёння ўсё». Па словах распрацоўшчыкаў, гэта прынцыпова адрознівае сэрвіс ад бясконцай стужкі сацсетак. Такім чынам кампанія імкнецца замацаваць звычку пачынаць дзень менавіта з ChatGPT, а не з сацсетак ці навінавых аплікацый.

Pulse задуманы як крок да ператварэння ChatGPT у паўнавартаснага асістэнта, а не проста чат-бота для адказаў на запыты. «Мы ствараем ШІ, які з часам дазволіць кожнаму атрымліваць падтрымку, раней даступную толькі самым забяспечаным», — заявіла дырэктар па аплікацыях OpenAI Фіджы Сімо. Функцыя пакуль даступна для падпісчыкаў Pro-плана коштам $200 у месяц, але ў будучыні павінна стаць даступнай і больш шырокай аўдыторыі.