OpenAI запусціла GPT-5 — «лепшую» ШІ-мадэль у свеце, і яна даступная бясплатна ўсім. Але не ўмее лічыць літары ў словах

GPT-5 — першая «уніфікаваная» мадэль OpenAI, якая спалучае лагічныя здольнасці мадэляў серыі «o» з высокай хуткасцю адказу сямейства GPT. Важнае новаўвядзенне — інтэлектуальны маршрутызатар, які аўтаматычна ў рэальным часе вызначае, як лепш апрацаваць запыт: хутка выдаць адказ ці затраціць час на больш глыбокае разважанне. Раней карыстальнік выбіраў налады ўручную.

Гендырэктар OpenAI Сэм Альтман называе GPT-5 «лепшай мадэллю ў свеце» і «значным крокам» на шляху да стварэння агульнага ШІ. Яна ўмее самастойна выконваць розныя даручэнні: ствараць праграмы, кіраваць календаром карыстальніка, рабіць аналітыку па розных тэмах і шмат іншага.

GPT-5 ужо даступна ўсім бясплатным карыстальнікам ChatGPT — нават без падпіскі — і ўключана па змаўчанні. Распрацоўшчыкі сцвярджаюць, што GPT-5 дэманструе перадавыя вынікі ў шэрагу ключавых абласцей і на многіх бенчмарках — напрыклад, SWE-bench Verified з задачамі на генерацыю кода з GitHub і GPQA Diamond, які ацэньвае веды па складаных пытаннях доктарскага ўзроўню, — апярэджвае мадэлі канкурэнтаў ад Anthropic, Google DeepMind і xAI. Таксама істотна палепшана дакладнасць адказаў і зніжаны ўзровень галюцынацый у параўнанні з іншымі мадэлямі OpenAI. Акрамя гэтага, GPT-5 радзей іншых мадэляў схільная да падману і маніпуляцый і лепш адрознівае шкоданосныя запыты і бяскрыўдныя пытанні карыстальнікаў.

Карыстальнікі ChatGPT могуць выбіраць адну з чатырох персаналізацый асістэнта на базе GPT-5: «Цынік», «Робат», «Слухач» і «Нёрд». Для падпісчыкаў ChatGPT Plus ($20 у месяц) павялічаны ліміты, а падпісчыкі Pro ($200 у месяц) атрымалі неабмежаваны доступ да GPT-5 і эксклюзіўнай версіі GPT-5 Pro з павышанай прадукцыйнасцю.

Распрацоўшчыкі змогуць убудоўваць GPT-5 у староннія праграмы праз API у трох версіях: gpt-5, gpt-5-mini і gpt-5-nano, якія адрозніваюцца хуткасцю і глыбінёй разважанняў. З’явілася магчымасць рэгуляваць даўжыню і інфарматыўнасць адказаў, а кошт апрацоўкі дадзеных складае $1,25 за мільён уваходных токенаў (каля 750 тысяч слоў) і $10 за мільён выхадных.

Карыстальнікі пачалі актыўна тэставаць навінку, і ўсё аказалася не так гладка. Раней у мадэляў узнікалі праблемы з падлікам літар «r» у слове «strawberry». GPT-5, відавочна, не любіць чарніцы: у слове «bluberry» яна знайшла цэлых тры літары «b».