Алеся Чапкевич world 18 снежня 2025, 21:26

OpenAI запусціла краму аплікацый ChatGPT

OpenAI запусціла App Directory — каталог аплікацый, дзе сабраны ўсе прадукты, якія падтрымлівае ChatGPT, піша Engadget. Сярод іх — Adobe Photoshop, Airtable, Canva, Notion, Slack, Spotify, Zoom і іншыя.

Пакінуць каментарый

OpenAI запусціла App Directory — каталог аплікацый, дзе сабраны ўсе прадукты, якія падтрымлівае ChatGPT, піша Engadget. Сярод іх — Adobe Photoshop, Airtable, Canva, Notion, Slack, Spotify, Zoom і іншыя.

Паралельна кампанія адкрыла распрацоўшчыкам доступ да SDK для стварэння інтэрактыўных аплікацый, якія працуюць прама ў інтэрфейсе чат-бота.

Таксама кампанія перайменавала «канектары», з дапамогай якіх можна падключаць пабочныя сэрвісы накшталт Google Drive ці Dropbox. Цяпер яны лічацца аплікцыямі: канектары для працы з файламі сталі «аплікацыямі з пошукам па файлах», інструменты для аналітыкі — «аплікацыі з паглыбленымі даследаваннямі», а сінхранізаваныя інтэграцыі — «аплікацыямі з сінхранізацыяй».

Удакладняецца, што аплікацыі могуць задзейнічаць функцыю памяці, калі яна актываваная ў карыстальніка. Пры гэтым для карыстальнікаў тарыфаў Free, Plus, Go і Pro OpenAI можа выкарыстоўваць дадзеныя ўзаемадзеяння з аплікацыямі для навучання сваіх мадэляў, калі ў юзераў уключана адпаведная налада.

Як менавіта OpenAI збіраецца зарабляць на экасістэме аплікацый, яна пакуль не тлумачыць. Кампанія вывучае дадатковыя спосабы манетызацыі, уключаючы лічбавыя тавары, і будзе дзяліцца дэталямі па меры таго, як распрацоўшчыкі і юзеры пачнуць актыўней карыстацца платформай.