Расійскія ІТ-кампаніі папрасілі дзяржпадтрымку на выпадак вяртання заходніх гульцоў — тыя ўжо наладжваюць сувязі з былымі супрацоўнікамі

Сярод прапаноў:

• увесці мытныя пошліны ў памеры 30% на імпартную прадукцыю;
• забараніць удзел замежных брэндаў у дзяржзакупках і выкарыстанне іх прадукцыі ў крытычнай інфармацыйнай інфраструктуры;
• увесці для замежных кампаній патрабаванне «санкцыйнай устойлівасці» як абавязковую ўмову для доступу на расійскі рынак: яны павінны будуць падпісаць пагадненне аб непадпарадкаванні санкцыям, асудзіць санкцыі і антырасійскую палітыку, адмовіцца ад любых прэтэнзій за парушэнне правоў інтэлектуальнай уласнасці ў санкцыйны перыяд, аднавіць гарантыйнае абслугоўванне і поўную тэхнічную падтрымку раней пастаўленай прадукцыі;
• асаблівым чынам маркіраваць прадукцыю кампаній, якія падтрымалі або падпарадкаваліся санкцыям;
• замацаваць палітыку падтрымкі незалежнай дыстрыбуцыі імпарту па аналогіі з паралельным імпартам, а таксама пазбавіць замежных вытворцаў выключнага права вызначаць каналы паставак сваёй прадукцыі ў Расію.

АРВЭ адзначае, што замежныя вендары актывізавалі пошук спецыялістаў на мясцовым рынку і аднаўляюць сувязі з былымі супрацоўнікамі, многія з якіх перайшлі ў расійскія кампаніі. У асацыяцыі лічаць, што вяртанне замежных вендараў можа прывесці да абясцэньвання контрсанкцыйных інвестыцый 2022–2025 гадоў. Таксама падкрэсліваецца, што зняццё санкцый на пастаўкі абсталявання ў Расію пры захаванні абмежаванняў на высокатэхналагічны імпарт электронных кампанентаў, уведзеных іншымі краінамі, ударыць па расійскай вытворчасці і можа прывесці да яе пераносу ў іншыя краіны. У АРВЭ непакояцца, што патрабаванне замежных інвестыцый у якасці ўмовы вяртання для замежных кампаній можа падмяніць канцэпцыю «тэхналагічнага суверэнітэту».

Члены асацыяцыі вырашылі прапрацаваць меры падтрымкі пасля таго, як пачаліся абмеркаванні паміж Расіяй і ЗША аб урэгуляванні вайны ва Украіне і аднаўленні дзейнасці замежных кампаній. Аналагічныя прапановы расійскім уладам рыхтуюць Асацыяцыя распрацоўшчыкаў праграмных прадуктаў «Айчынны софт», Асацыяцыя прадпрыемстваў камп’ютарных і інфармацыйных тэхналогій, кансорцыум «Вылічальная тэхніка» і Асацыяцыя кампаній-распрацоўшчыкаў праграмнага забеспячэння «Руссофт».