Кампанія вырашыла плаціць 80% ад заробкаў, а ў 2023 вярнуць доўг. Пакуль не выйшла
CEO Paralect Зміцер Шчатніковіч расказаў у сацсетках пра рэалізаваную антыкрызісную ідэю. Кампанія некалькі месяцаў плаціла супрацоўнікам 80% заробку, а потым на працягу года збіралася паступова пагасіць усе даўгі. Але нешта пайшло не так.
Ідэя была рэалізаваная пры канцы мінулага года. Паводле слоў CEO, супрацоўнікі Paralect атрымлівалі на 20% менш за звычайнае на працягу трох месяцаў — ад лістапада 2022 да студзеня 2023. Далей на працягу 8 месяцаў з супрацоўнікамі планавалася цалкам разлічыцца. Як кампанія збіралася гэта зрабіць, Зміцер Шчатніковіч паказаў на графіку на прыкладзе заробку ў 1000 долараў.
- Лістапад 2022 — студзень 2023 — 80% заробку;
- Люты-сакавік 2023 — 100% заробку;
- Красавік-лістапад 2023 — 107,5% заробку.
Аднак з нейкіх прычын кампанія была вымушаная змяніць графік выплат і перанесці пагашэнне ўсіх даўгоў перад супрацоўнікамі яшчэ на тры месяцы. Пра гэта CEO папярэдзіў у сваім пасце.
«У жніўні, верасні і лістападзе ўсе будуць атрымліваць 100% заробку, а не 107,5%, як мы планавалі», — напісаў ён, не ўдакладніўшы прычыны.
Мы звярнуліся да Змітра Шчатніковіча па каментары. Апублікуем адказ, калі атрымаем.
Paralect — беларуская кампанія, заснаваная ў 2009 годзе. З’яўляецца пастаўшчыком поўнага цыкла паслуг па распрацоўцы SaaS рашэнняў. Стварае бізнэс-прадукты для шырокага спектра індустрыі і кліентаў ва ўсім свеце.
У кампаніі працуе каля 200 супрацоўнікаў. На сайце пазначаныя кантакты офісаў у дзвюх лакацыях — у Мідлтаўне (ЗША) і Варшаве.
Пагасіць доўг маёмасцю
Згадалі іншыя кейсы, калі кампаніі завінаваціліся супрацоўнікам і як спрабавалі выйсці з сітуацыі.
Летась праблемы з выплатай заробкаў паўсталі ў мінскага гэмблінг-распрацоўшчыка «Скайвінд Тэк Бай». Улетку кампанія апавясціла частку каманды аб пераходзе на 4-гадзінны працоўны тыдзень і зніжэнні ім заробку на 90% — «праз пандэмію, жорсткую канкурэнцыю на рынку і санкцыі ў дачыненні да Беларусі».
З даўгамі па заробках у 2022 годзе сутыкнуліся супрацоўнікі мабільнага распрацоўшчыка WannaPlay. Кампанія вырашыла скараціць штат. Некаторым супрацоўнікам прапанавалі дапрацаваць да канца кантракта за мінімальны ў Беларусі заробак — 481 рубель.
Яшчэ адная геймдэў-кампанія Eon Games у 2022 годзе страціла інвестараў і засталася без неабходных фінансавых рэсурсаў. Супрацоўнікі пагадзіліся месяц працаваць без заробку.
Блакчэйн-стартап DEIP не плаціў заробкаў больш за два месяцы. Некаторым супрацоўнікам кампанія завінавацілася 10 тысяч долараў.
Мінскі аўтсорсер «Мільжыкс» са штаб-кватэрай у Канах не плаціў заробкаў некалькі месяцаў, спасылаючыся на затрымкі з боку кліентаў. Працаўнікам прапанавалі пагасіць доўг маёмасцю.
dev.by, як і іншым сумленным медыя, сёння вельмі складана: рэдакцыя працуе па-за межамі краіны, а нашыя рэкламныя даходы скараціліся ў некалькі разоў. Але мы даем рады — з вашай дапамогай. Гэта вы дзеліцеся з намі інфанагодамі, думкамі, досведам, часам і ўвагай. А 210 чытачоў падтрымліваюць нас данатамі.
У 2023 годзе мы хочам сабраць 1000 чытачоў-падпісчыкаў.
Дапамагчы нам можна праз Patreon.
І яшчэ крыптой, тут гаманцы.
Дзякуй, што прачыталі гэтае паведамленне.
Читать на dev.by