Першы пацыент Neuralink навучыўся кіраваць курсорам з дапамогай думкі

Падчас учорашняй аўдыясустрэчы ў Spaces у сацсетцы Х прадпрымальнік расказаў, што пацыент ужо цалкам акрыяў пасля аперацыі, пабочных эфектаў не назіраецца. Цяпер распрацоўшчыкі Neuralink спрабуюць дамагчыся ад яго як мага большай колькасці націскаў на кнопкі мышы.

Neuralink распрацоўвае інтэрфейсы для прамога ўзаемадзеяння паміж мозгам і камп’ютарам. Стартап упершыню імплантаваў свой чып чалавеку ў студзені. Дазвол органаў-рэгулятараў на эксперыменты на людзях быў атрыманы ў мінулым верасні. Аперацыя па ўжыўленні чыпа праводзіцца пры дапамозе робата і займае дзве гадзіны, але Маск хоча паскорыць яе да 15 хвілін.

Для пачатку распрацоўшчыкі ставяць мэтай навучыць пацыентаў думкамі кантраляваць курсор і клавіятуру. У далейшым нейрачып таксама мае дапамагаць людзям, якія пакутуюць ад атлусцення, дэпрэсіі, шызафрэніі і іншых захворванняў. Neuralink ацэньваецца ў $5 млрд.