PKO паабяцаў не блакаваць старых кліентаў, але перадумаў? Адпраўляе пушы пра новы дэдлайн. Але ўсё дзіўна

Прачыталі шмат каментароў і не знайшлі (пакуль) ніводнага выпадку блакіроўкі ў сувязі з 19-м пакетам санкцый — ні сярод тых, хто атрымаў пуш-паведамленні, ні сярод тых, хто адкрыў рахунак пасля 24 кастрычніка 2025 года. Многія (калі не большасць) паведамленняў не атрымалі зусім.

Вось што пішуць тыя, у каго ўсё ў парадку:

• «Рахунак — з мая 22-га, [з банка] пісалі. Сам [туды] хадзіў, званіў — адказвалі, што заблакуюць. [Прайшло] чатыры дні [пасля 11 снежня] — палёт нармальны, давялося частку грошай назад на рахунак вяртаць».
• «Рахунак адчынены ў ліпені 2022, ад банка ніякіх лістоў і тэлефанаванняў не было, нічога не блочылі».
• «Адкрываў асабісты рахунак вясной 2022, бізнес-рахунак — летам 2023. Тое і другое адкрываў па візе. Ніякіх паведамленняў ад банка не атрымліваў. Апка працуе».
• «Адкрываў у 2023 годзе на пашпарт РБ, пабыту яшчэ не было. Паведамленняў банк не дасылаў, ВНЖ не прасіў. Усё працуе».
• «Адкрываў рахунак год і дзевяць месяцаў таму, пакуль што нічога не заблакавалі, ніхто не званіў. Але прыходзіла масавая рассылка. Чакаем. Пабыту яшчэ няма».
• «Рахунак адкрываў у 2022. ВНЖ ёсць, але не прыгадваю, каб я яго туды паказваў. У дакументах у профілі стаіць нумар пашпарта. Але там жа пазначаны і PESEL — па ім могуць жа правяраць?»
• «Не пісалі, не блакавалі, рахунак з 2024».

«Канец свету» наступіць адразу пасля святаў?

Зрэшты, гэта не значыць адбой трывогі. Наадварот.

Ёсць нагоды для новай трывогі — гісторыі пра тое, PKO перадумаў пакінуць старых кліентаў у спакоі (а замест гэтага блачыць толькі новых кліентаў без ВНЖ, пра што ён афіцыйна расказаў devby), а таксама новыя званкі і пуш-паведамленні ад банка. У іх PKO называе кліентам свежую дату блакіроўкі картак і анлайн-паслуг — 5 студзеня. Здаецца, банк абзвоньвае ў асноўным тых кліентаў, якія раней атрымалі пуш-паведамленні з патрабаваннем прынесці ВНЖ да 11 снежня. Некаторым апдэйт пра студзень прыходзіць зноў у выглядзе пуша.

Вось што пра студзеньскае адключэнне пішуць кліенты банка:

• «Пачаліся празвончыкі з PKO. Толькі што патэлефанавалі і папрасілі данесці картку да 5 студзеня, інакш заблакуюць. Картка ёсць, але пры адкрыцці рахунку не прасілі. Званілі з аддзела AML».
• «Патэлефанавалі з банка, сказалі, што блок будзе 5.01.2026. Да гэтага былі пуш-паведамленні. Мы хадзілі нагамі ў некалькі аддзяленняў, але дакументы пра тое, што мы чакаем дэцызію, не прынялі.

Мой рахунак адкрыты ў лістападзе, у жонкі — у 2023 годзе. Ёй таксама патэлефанавалі і сказалі пра 5 студзеня. Прычым абяцаюць заблакаваць і асабісты рахунак, і JDG.

Чаму я адкрыў рахунак толькі ў лістападзе? Таму што ў мяне якраз заканчваўся 3-гадовы ВНЖ і Alior Bank, дзе я да гэтага абслугоўваўся 3,5 гады, адмовіў мне. Я адкрыў рахунак у PKO за 2 тыдні да заканчэння ВНЖ, а пуш-паведамленне яны даслалі праз два дні пасля таго, як мая карта пабыту ўжо скончылася. Гэта значыць пайсці ў іншы банк я ўжо не магу.

Аплікацыя Alior пакуль працуе, але пры кожным уваходзе выдае папярэджанне, што мяне могуць заблакаваць у любы момант. А PKO абяцае заблакаваць 5 студзеня.

Які план? Хадзіць у банк і здымаць наяўныя за кватэру плаціць пераводам. Іншага выйсця я не бачу».

• «Рахунак у PKO адкрываў летам 2023 года. У пачатку снежня прыходзіла паведамленне пра 11 снежня. А сёння патэлефанавалі з банка па тым жа пытанні. Я паведаміў, што чакаю пабыт, яны сказалі, што ў студзені заблакуюць блік, інтэрнэт-банкінг, апку. Пабіўся ў сцяну крыху, але, як і пры асабістым візіце, даведаўся, што ні пячатку, ні даведку аб чаканні ВНЖ прымаць не будуць. Чакаю студзеня».

+ 1 неверагодная гісторыя пра 5 студзеня

Калі коратка: беларуска расказала devby, як пасля пуша пра 11 снежня схадзіла ў банк з дзеючым ВНЖ, яго там нават не паглядзелі, пакінулі рахунак на пашпарце і сказалі, што ўсё окей. Праз хвіліну пасля гэтага аповеду яна атрымала новы пуш — пра 5 студзеня.

У дэталях:

«ВНЖ і пашпарт у мяне актуальныя, рахункі (асабісты + JDG) я адкрывала з абодвума дакументамі ў кастрычніку 2024 года. Карту пабыту яны тады ў рукі дакладна бралі.

Таму я вельмі здзівілася, атрымаўшы пуш-паведамленне пра 11 снежня. Прычым яно прыйшло 10 снежня, за дзень да меркаванай блакіроўкі. Зірнуўшы ў дагавор, я сапраўды выявіла, што там пазначаны мой пашпарт.

12-га я пайшла ў банк, паказала ім паведамленне пра данясенне докаў, пані ў камп’ютары зверыла дадзеныя пашпарта, нумар тэлефона, email, адрас. Я працягнула ёй карту пабыту — яна адказала, што не трэба. Так і сказала на маю працягнутую руку: nie trzeba.

Чаму я наогул не атрымала паведамленне, я не ўдакладніла (а трэба было) — можа, мая картка ў сістэме была ўпісана як дадатковы дакумент? Але навошта было актуалізаваць пашпарт, які яшчэ не сканчаецца, усё роўна няясна.

Пакуль усё працуе, але буду назіраць: людзі пішуць, што блакіроўкі чакаюцца ў студзені».

Заблытаная гісторыя атрымала працяг літаральна праз хвіліну.

— Не паверыце, мне толькі што выслалі гэта:

+1 гісторыя, каб канчаткова вас заблытаць

Яшчэ адзін беларус без ВНЖ перад 11 снежня чакаў перавод на свой рахунак у PKO, адкрыты пяць гадоў таму. Пуш-паведамленняў ён не атрымліваў, але прэвентыўна сам напісаў запыт у банк — ці дакладна з ягоным рахункам усё ў парадку?

І атрымаў стандартны пазітыўны адказ пра 24.10: маўляў, калі рахунак адкрыты раней, няхай пан не турбуецца. Такія суцяшальныя адказы атрымлівалі і іншыя кліенты PKO, але ў першых лічбах снежня. Гэты ж прыйшоў 12 снежня — у дні, калі банк ужо ўсімі сіламі рассылаў новыя, «злыя», паведамленні пра блакіроўкі 5 студзеня.

Мы папрасілі PKO актуалізаваць каментар. Апублікуем, як толькі атрымаем.