Пераможца прэстыжнага фотаконкурсу адмовіўся ад узнагароды. Яго здымак стварыў АІ

World Photography Organisation абвясціла пераможцаў найбуйнейшага ў свеце конкурсу фатаграфіі Sony World Photography Awards 2023. У катэгорыі Creative перамог здымак «Pseudomnesia: Тhe Electricia» аўтарства нямецкага мастака Барыса Эльдагсена. У прэс-рэлізе Sony пазначана, што гэта «запамінальны чорна-белы партрэт дзвюх жанчын розных пакаленняў, які нагадвае візуальную мову сямейных партрэтаў 1940-х гадоў».

Аўтар прызнаўся, што здымак быў цалкам створаны з дапамогай штучнага інтэлекту. Паводле слоў Эльдагсена, за сваю трыццацігадовую кар’еру ён упершыню звярнуўся да АІ-алгарытмаў. Выява — гэта вынік «комплекснага ўзаемадзеяння інжынерыі шматзадачных падказак, рэтушавання і дапрацовак, заснаваных на маіх ведах пра мастацтва фатаграфіі», — напісаў мастак. Ён падзякаваў суддзям за тое, што яны адзначылі паказаную працу, але адмовіўся ад узнагароды.

Мастак назваў факт прысуджэння гэтай узнагароды гістарычным момантам, заявіўшы, што больш за ўсё яму цікава даведацца, ці паўсталі хоць у кагосьці з сяброў журы падазрэнні пра ўдзел у стварэнні здымка АІ. «У такога роду конкурсах выявы, створаныя АІ, не могуць на роўных канкураваць са звычайнымі здымкамі. Гэта проста розныя сутнасці. АІ — гэта не фатаграфія. Таму ад узнагароды я адмаўляюся», — патлумачыў ён. Такім чынам мастак хацеў пачаць грамадскую дыскусію пра ролю АІ у выяўленчым мастацтве.