Польшча адкрывае мяжу з Беларуссю

«Хачу паведаміць аб прынятым рашэнні — сумесна з міністрам унутраных спраў, які ўжо сёння, у бліжэйшы час, выдасць адпаведнае распараджэнне — аб паўторным адкрыцці памежных пераходаў, чыгуначных і аўтамабільных. Тых, якія былі зачынены ў сувязі з манёўрамі „Захад“ і, што зразумела, з ростам пагрозы і палітычнай нестабільнасці, як ля нашых межаў, так і ў нашым рэгіёне. Як вы ведаеце, вучэнні „Захад“ скончыліся, адначасова на тэрыторыі Польшчы ў вялікім маштабе праходзілі саюзніцкія вучэнні. Мы прысутнічалі на іх разам з міністрам нацыянальнай абароны», — сказаў прэм’ер на пасяджэнні ўрада. Яго цытуе партал Wydarzenia w INTERIA.PL.

Паводле слоў кіраўніка ўрада, вучэнні ў Польшчы «былі ацэнены значна лепш, чым тыя нядружалюбныя нам вучэнні па іншы бок мяжы». Ён падкрэсліў, што гэта «ўзмацняе пачуццё бяспекі».

«Як мы і прагназавалі, завяршэнне гэтых манёўраў змяншае рознага роду пагрозы, звязаныя з агрэсіўнай пазіцыяй нашых усходніх суседзяў», — адзначыў Туск.

Паводле яго слоў, мяжа будзе адкрыта ў поўнач з серады на чацвер 25 верасня.

Нагадаем, расійска-беларускія ваенныя вучэнні «Захад-2025» праходзілі 12-16 верасня. Аб поўным закрыцці межаў у ноч на 12 верасня стала вядома за некалькі дзён да гэтага. Польскія ўлады падкрэслівалі, што заканчэнне мерапрыемстваў па той бок мяжы з усходняй суседкай не гарантуе аднаўлення руху.