Польскі нацбанк расказаў, колькі беларусы зарабляюць, трацяць і адпраўляюць дадому

Так, большасць беларусаў — 56% — з’ехалі з Беларусі з-за палітыкі, і толькі 32% — па эканамічных прычынах. Больш за 80% беларускіх мігрантаў складаюць людзі да 44 гадоў з вышэйшай адукацыяй.

29% працягваюць адпраўляць грошы на радзіму (год таму было 33%). Часцей за ўсё — раз у 2-3 месяцы. Палова пераводаў не перавышае 1 тысячу злотых.

64% беларусаў у Польшчы працаўладкаваныя, 14% адкрылі ўласны бізнес. 17% занятыя ў ІТ — гэта самая высокааплатная група, дзе палова атрымлівае больш за 10 тысяч злотых нета.

Да 80% месячнага даходу беларусы выдаткоўваюць на бягучыя расходы. Толькі 15% жывуць «ад зарплаты да зарплаты», выдаткоўваючы амаль усё. У сярэднім зарплата складае 93% усіх даходаў беларусаў у Польшчы, астатняе даюць дапамогі і дробныя дадатковыя крыніцы.

Што датычыцца планаў на будучыню, 54% хочуць застацца ў Польшчы назаўжды, а 1% збіраецца вярнуцца ў Беларусь у найбліжэйшы год.