Карыстальнікі знайшлі ў справаздачы Take-Two намёк на дату выхаду GTA VI

У справаздачы сказана, што ў наступным фінансавым годзе кампанія плануе дасягнуць рэкорднай выручкі ў $8 мільярдаў і больш дзякуючы «выхаду гучных блокбастараў». Выдавец заявіў, што рыхтуе «некалькі рэвалюцыйных гульняў», якія «вызначаць новыя стандарты ў гульнявой індустрыі». Карыстальнікі мяркуюць, што навінка Rockstar можа выйсці ад 1 красавіка 2024 года да 31 сакавіка 2025 года.

«Зазіраючы ў будучыню, 2025 фінансавы год з’яўляецца доўгачаканым годам для нашай кампаніі. На працягу апошніх гадоў мы рыхтавалі наш бізнэс да выпуску надзейнага набору гульняў, якія, як мы верым, прывядуць нашую кампанію да яшчэ большых поспехаў», — сказана ў справаздачы. 2025 фінансавы год у ЗША — гэта каляндарны перыяд ад красавіка 2024-га да сакавіка 2025 года. Пра распрацоўку GTA VI кампанія абвясціла ў лютым 2022 года.