Папулярнасць TikTok у Беларусі назвалі адлюстраваннем інфармацыйнай дэградацыі
З восені 2023 года TikTok дамінуе сярод інтэрнэт-платформаў, якія фарміруюць штодзённы парадак дня ў Беларусі. Гэта кажа не столькі пра тэхналагічную моду, колькі пра глыбокую трансфармацыю інфармацыйных паводзінаў аўдыторыі краіны: забаўляльная па сваёй сутнасці сацсетка стала галоўнай крыніцай кантэнту для значнай часткі беларусаў. Пра гэта пішуць эксперты FactCheck.by.
Змена інфармацыйных перавагаў аўдыторыі праяўляецца ў імкненні да менш палітызаванага кантэнту і пазбяганні навіннай аналітыкі, у забаўляльным фокусе замест адукацыйнага, кароткіх фарматах замест глыбокага аналізу, адсочванні лакальных трэндаў замест міжнароднага парадку дня. То бок уважлівае спажыванне інфармацыі выцясняецца кліпавым мысленнем.
Такая трансфармацыя з’яўляецца адаптацыйным механізмам. Эскапізм стаў для многіх формай псіхалагічнай абароны ад інфармацыйнага стрэсу. Карыстальнікі адгароджваюцца ад складаных тэм і выбіраюць лёгкія і эмацыйна нейтральныя відэа, тлумачаць даследчыкі.
Для медыйшчыкаў і фактчэкераў гэта азначае кардынальную змену звычак аўдыторыі. Калі раней яна складалася з людзей, якія актыўна шукаюць і крытычна ацэньваюць інфармацыю, то сёння іх месца занялі тыя, хто свядома пазбягае складанага кантэнту.
Да зніжэння спажывання аналітычнага кантэнту прывялі рэпрэсіі, якія пачаліся ў 2021 годзе, паколькі яны справакавалі ад’езд стваральнікаў і спажыўцоў якаснага інфармацыйнага прадукту. Дэградацыя інфармацыйнага асяроддзя паскорылася на фоне ўзмацнення ціску і ўвядзення тэхнічных абмежаванняў у 2022 годзе і закранула больш шырокія пласты аўдыторыі. Перыяд з 2023 года характарызуецца «зачысткай» рэштак незалежнай журналістыкі, што прывяло да стабілізацыі прымітыўнага медыяландшафту, адзначылі эксперты.
Читать на dev.by