Старшыня рады дырэктараў Tesla распрадала амаль усе свае акцыі. Ніхто не ведае навошта

Згодна з апошнімі дакументамі, пададзенымі ў Камісію ЗША па каштоўных паперах і біржах (SEC), Дэнхолм мае намер прадаць яшчэ 112 390 акцый Tesla прыкладна на $32 мільёны. Гэта ўжо трэці падобны выпадак за апошнія тры месяцы, калі яна падае заяўку на продаж буйнога пакета акцый такога памеру.

Робін Дэнхолм была найбольш актыўным прадаўцом акцый Tesla сярод інсайдараў. За апошнія 6 месяцаў яна прадала акцый кампаніі на суму больш за $150 мільёнаў. З моманту далучэння да рады дырэктараў 10 гадоў таму яна атрымала кампенсацыю ў выглядзе акцый на суму больш за $600 мільёнаў і ўжо прадала акцый на суму больш за $500 мільёнаў. Такім чынам, у яе засталося ўсяго 85 000 акцый і 300 440 апцыёнаў, тэрмін дзеяння якіх сканчаецца ў канцы гэтага года.

Распродаж акцый адбываецца на фоне няпростага перыяду для Tesla. Спажыўцы ў Еўропе адмаўляюцца ад электрамабіляў кампаніі на карысць кітайскіх мадэляў. Продажы скарачаюцца, нават нягледзячы на агульны рост попыту на электрамабілі ў свеце. Cybertruck аказаўся не такім паспяховым, як чакалася, і кампаніі даводзіцца выкарыстоўваць яго для прасоўвання іншых мадэляў. Апошні фінансавы справаздачны даклад таксама паказаў падзенне прыбытку.

Крыніцы адзначаюць, што, верагодна, Дэнхолм не застанецца ў радзе дырэктараў да канца года, паколькі ўсё выглядае так, быццам яна ліквідуе сваю пазіцыю. Таксама крытыкі называюць яе ролю як старшыні намінальнай: маўляў, яе асноўная функцыя зводзілася да атрымання кампенсацыі, пакуль Ілан Маск прымаў рашэнні пасля яго адхілення ад гэтай пасады.