Прэзідэнт Польшчы ўнес у парламент законапраект, які значна павялічыць тэрмін атрымання грамадзянства

Прапануецца змяніць артыкул 30 Закона аб замежніках, пункт 1, падпункт 1 — каб замежнікі перад падачай на грамадзянства праводзілі на сталым побыце ці ў статусе рэзідэнта ЕС не 3, а 10 гадоў.

Пры гэтым нічога не гаворыцца пра іншы пункт таго ж закона, дзе сказана, што падацца на грамадзянства можна праз 10 гадоў легальнага знаходжання, без дакладнага ўказання тэрміну на ПМЖ. У выпадку прыняцця змяненняў гэтыя пункты будуць супярэчыць адзін аднаму, падкрэслівае DzikPic.

Законапраект вынесены на грамадскае абмеркаванне. Выказаць сваё меркаванне па ім можна тут. Кансультацыі будуць доўжыцца да 25 верасня.

Прапанаваная змена абгрунтоўваецца тым, што яна нібыта забяспечыць больш глыбокую інтэграцыю замежнікаў у польскае грамадства, гарманізацыю польскіх нормаў з еўрапейскімі і стане адказам на выклікі, звязаныя з павелічэннем іміграцыі.

«Прапанаваная змена мае на мэце стварэнне ўмоў, якія спрыяюць больш поўнай інтэграцыі замежнікаў перад наданнем ім польскага грамадзянства, што з’яўляецца ключавым для сацыяльнай і эканамічнай стабільнасці Польшчы ва ўмовах дынамічнага росту іміграцыі», — гаворыцца ў тэксце дакумента.

Гэта ўжо не першы законапраект, дзе прапануецца дадзеная мера. Пасля ацэнкі папярэдняга было вырашана, што ён наадварот затармозіць інтэграцыю замежнікаў і негатыўна адаб’ецца на эканоміцы. А Савет міністраў пастанавіў не працягваць працу над праектам.