«Спрабаваў не памерці»: польскі праграміст перамог мадэль OpenAI на турніры па кодынгу

У межах спецыяльнага выставачнага матча «Humans vs AI», арганізаванага японскай платформай AtCoder пры падтрымцы OpenAI, удзельнікам — 12 лепшым праграмістам свету і ШІ-мадэлі OpenAIAHC — было прапанавана вырашыць за 600 хвілін задачу па аптымізацыі маршруту для робата.

Усе працавалі на аднолькавых прыладах і маглі выкарыстоўваць любую мову праграмавання з даступных на платформе, аднак карыстацца інтэрнэтам і знешняй дакументацыяй было забаронена.

42-гадовы польскі распрацоўшчык Пшэмыслаў Дэмбяк («Psyho»), экс-супрацоўнік OpenAI, не ведаючы да старту, што яму давядзецца спаборнічаць і з машынай, з першых гадзін лідзіраваў, а канчатковы адрыў ад штучнага інтэлекту склаў 9,5%: «Psyho» набраў 1,81 трлн балаў супраць 1,65 трлн у OpenAIAHC. Пры гэтым ШІ-мадэль апярэдзіла ўсіх астатніх фіналістаў і заняла другое месца.

«Калі б не канкурэнцыя з ШІ, мой вынік быў бы значна горшы», — прызнаўся пераможца пасля фінішу. Па яго словах, напружаная барацьба з машынай літаральна «выціснула ўсе сілы» — і нагадала легенду пра Джона Генры, які ў XIX стагоддзі спаборнічаў з паравой машынай.

У OpenAI назвалі другое месца «вялікай вехай» для мадэляў у сферы спаборніцкага праграмавання: «Спаборніцтвы кшталту AtCoder дазваляюць праверыць, наколькі нашы мадэлі здольныя мысліць стратэгічна і паляпшаць рашэнні метадам спроб і памылак, як гэта робіць чалавек», — адзначылі ў кампаніі.

Нягледзячы на ўражлівы вынік, на думку адміністратараў чэмпіяната, штучнаму інтэлекту ўсё яшчэ не хапае чалавечай крэатыўнасці, што і дазволіла Дэмбяку захаваць лідэрства. Аднак нават сам пераможца лічыць поспех «часовым»: ужо ў бліжэйшыя гады новыя пакаленні ШІ могуць узяць рэванш.